Philippines Tir, Duterte-i Japan linük semdangogo

Tokyo, October 26 (Agencies): Philippines Tir, Rodrigo Duterte-i Japan yimtiba, Tokyo yashi, Mongolbar nü tonga aoba sülen Japan Ato Kilonser, Shinzo Abe den tanü, Bodbar nü ajurutepogo.
Pai taoba hopta China linük semdangdang China lenirtem den linük kümzüktsü masü saka rongsenren tezüngzüktep ang agi ta shia, China den adoka benshiba South China Sea (SCS) den sentakba mangatettep ken o nung par Philippines linüki Japan sorkar pusema nungitsü renemba olen ka Duterte-i Abe den tanü lemsatepa liasü.
Duterte-i Abe den senden amenba jakdang Philippines linük den küm aika tesendaktep junga aruba linük, US den taoba mapang agiba mitkar tezüngzükteptem agientsü bilemba olen ka metetdakja, pai US maneni aija liasü.
Duterte-i mekümdangi onük balala sangokja senzüba ajanga tarutsü mapang Philippines’er bendang mapatongtem nem tetsükdaktsü bener arutsütsü akok ta par nübur aser alimai tebilemtsü kaa reprangba mapang ka nung Duterte-i tan Japan linük semdanger lir.
Duterte-i taoba hopta China semdangdang par Philippines-i US den joko sentaktepa malitsü lemtetba olen ka sangoktsü saka tesülen, iba olenji melenshia, par linüki bendang linük ka kübok malitsü bilemba olen lemsatep ta paisa osang jangjashija liasü.
Pai o melenshia jembiba ajanga Washington den tesendaktep takangba yanglushia alisang, Abe-i Philippines densema, Southeast Asia nung tentetba linüktem den tesendaktep junga yanglushitsü mapatong nem terata tia ka bener arutsütsü tenzüka lir.
“Ni taoba hopta China semdangdang China lenirtem den rongsenren den sentakba onüktem dang benoka jembi. Ni par lenirtem den linük kümzüktsü aser mitkar tesendaktep tajungba küma yanglushitsü onükbo benoka jembi,” ta Duterte-i Abe den aroki osangbener den ajurutepdang sangoktsü.
Ano külen, Duterte aser Abe nati Philippines Coast Guard atema patrol rong 2 yanglutsü densema, dollar sen million 205 shi jenjang aketba mapatong balala inyaktsü tezüngzüktep tanü agiba osang jangjaogo.