Philippines tsüngteper mongin, Pacquiao-i Senate menden ajangzüker

Philippines Congress Upper House nung Senator akümtsü jenjang angusang, Manny Pacquiao (Tiyongtsü)-i Manila yimti kübok Philippine International Convention Centre nung Senator akümtsü jenjang anguba kulikaket amer agiba noksa ka yangi angur. (Manila, May 19)

Manila, May 19 (Agencies): Philippines nunger tsüngteper mongin, Manny Pacquiao-i par Phillipines sorkar tasenba nung Senate menden abentsü jenjang tanü, Brehostibar nü ajangzükogo.
Taoba hopta agiba election nung takok ngua, Phillipine’s Congress Upper House züngsem akümtsü jenjang angur candidate 12 rong nung Pacquiao tenünga densemba osang ka Phillipines Election Commission (PEC)-i tanü metetdaktsü.
Küm 6 nung ken agiba election nung Philippines nunger nisung million 55 shi par Tir, Tatong Tir, Senator 12, Congress Lower House yimsüsür 200 aser yimti o jila balala nung lenir 18,000 tashi shimtsü asoshi par vote taoba hopta agüja liasü.
“Ni tsüngtepdang kü taküm azüoka aliba ama, asen linük tenzüktsü atema kü taküm azüoka nungdakba maparen bendanga agüja inyaktsü nangzüker,” ta Pacquiao-i tan election nung takok anguba osang angazükba sülen osangbener den ajurutepdang metetdaktsü.
“Ozüng alema mozümora shibelenba aser iba amala ozüng alema kanga sashia inyaka aibelener nem tasüba temerenshi agütsütsü onükji nia pusemer,” ta shia, par Philippines ajunga nung angati agi kaketshisatsü agütsüdaktsütsü asoshi nungdakba maparen inyaktsü tenangzükba olen ka arishi küm 37 tain Pacquiao-i metetdakja liasü.
Tan agiba election nung takok ngua, Philippines Tir menden abentsü jenjang ngua alisang, Rodrigo Duterte-ia 2006 küm nungi agienba aibelener nem tasüba temerenshi agütsütsü maparen tanaben benshitsü onük Congress nung benoktsü asoshi tawa metetdaktsüogo.
WBO world welterweight champion, Pacquiao-i tan election nung vote million 16 shi ngua, azüngteta aliba Congress Upper House menden 12 ajangzüker candidate tarensen nung 7 buba jenjang anguba osanga jangjaogo.