Philippines yipru nung nisung 4 asü

Manila, October 19, 2015: Hombar nü, Philippines, North Manila kübok Quezon yimti nung ‘Typhoon Koppu’ ta ajaba yipru tesashi ajanga süngdong laoa ki raksatsüba sülen parnoki kilemi tua süngdong lendokba noksa nung angur. Iba yipru ajanga northern Philippine province mejungi kongshia tzümetsüngba ajanga yimtaklir kilem kolaki tua jenoka lia Army, police aser temelungertemi kümzükba maparen inyakogo.

 Manila, October 19 (Agencies): ‘Typhoon Koppu’ ta ajaba yipru tesashi ajanga Philippines nung tajemba agi nisung pezü taküm samatsüogo aser nisung 25,000 dak tema iba yipru agi kongshia lir, Hombar nü iba yipru ya süshia aor amai aküm ajisüaka province 20 shi nung maneni kümdanga alitsü metetdaktsüogo, ta ketdangsertem sangdong ka ajanga ashi.

Koppu yipru kanga sashia süiba ajanga Deobar anepdang Luzon asetkong nung anentsüh tulu aludaktsü aser Aurora province nunga kilem shizüka bener aoba den süngdong tema tera meküpa laodaktsü.

Iba yipru ajanga mopung ghonda nung kilometre pongu tashi dang ondaktsüba ajanga Mongolbar nü tashi nungbo anentsü ta bilema liasü, ta Philippine Atmospheric, Geophysical & Astronomical Services Administration ajanga ashi.

Yipru agi kongshiba tesem nung sorkar ketdangsertemi, yipru nung tajemba agi nisung pezü taküm samaogo, ta ashiba EFE-i ajanga metetdaktsü.

National Disaster Risk Reduction Council-i Hombar anepdang nisung ana süogo aser pongu yirua lir, ta shia liasü.

Tasüba ya ano tali ang alitsü akok kechiba süra tesem aika nungi ano osang tejangja magiteti lir.

Department of Social Welfare & Development osang ajanga ashiba agi, nisung 203,000 shi Koppu yipru yagi kongshia lir aser parnok rongnung nisung 60,000 shi nem teyari agütsüdar.

Nueva Ecija province nung aliba San Antonio nung tekolakba Antonio Lustre-i, “Ozü jila tzü agi metsüngbanga lir aser nüburtem kilem kolak nungi teyari meshia ayimtener,” ta ashi.

Linük yimtiba, Manila bo iba yipru tezü agi metangshir ajisüaka tzünglu aser mopung kanga sashia alua aoner.