Phillipines tzüyim sepaitem den yariteptsü mulunga lir: US

Manila, February 03 (Agencies): China den mangatettep adokba South China Sea nung Philippines tzüyim mitkartem den yaritepa patrol jajatsü mulunga aliba olen ka Philippines-i yokba US Ambassador, Philip Goldberg-i tanü Bodbar nü metetdaktsüogo.

Küm shia alimai shishilembaba dollar sen trillion 5 shi jenjang aketba osettsüset bener ajangdak, South China Sea tzüyim shilem tuluba ka par meyong ta China-i züngshir.

Ajisüaka, kidangsüa aliba Vietnam, Malaysia, Brunei, Phillipines aser Taiwan linüktemi iba olenji magizüki China den mangatettep ken o benoka lir.

Tetsükdakba kechi meli senzütsü temeten lir ta sayutsü nükjidong nung US-i par Navy destroyer rong ka China-i par meyong ta züngshiba tzüyim tesem nungi nautical mile 12 shi pilar taoba Honibar nü jajadaktsüba sülen China-i mepelaba olen ka benokba osanga jangjaogo.

China-i mangatettep adokba tzüyim kübok asetkong 3 nung tentetba tayimtsü anendak nungi par mitkar tayimtsütem tendanga yimzüdaktsüba sülen mangatettep adokba tzüyim tesem mita senzütsü maparen nung par linük den yariteptsü asoshi Manila-i US dang asüngdanga lir.

“Ozü US tzüyim sepaitemi Phillipines den yaritepa mangatettep adokba tzüyim tesem mita senzütsü maparen inyaktsü mulunga lir,” ta Philip-i nenshia ashi.

Philippines sorkari China anema The Hague nunga South China Sea ken o benoka lir saka Beijing-i iba onükji magizüki lir.

US aser Philippines defense minister nati küm 3 tsüngda nung tan agi tasembenbuba ajurutepa, Washington nung taoba January ita senden mena South China Sea den sentakba onük benokba osanga jangjaogo.