Phone ajanga train ticket cancel sütettsü

New Delhi, March 27 (Agencies) : Indian Railway-i taruba ita nungi train ticket cancel asütsü lenmang tesadem aser temela ka lapoktsütsü. Iba inyakyim ajanga ticket alia alirtem kar ajungbena ticket cancel süa sen meyipa aginer saka atakteta aliba mapang tsüngda nung station tonga aotsü mapang mali ta asürtem kanga ajangzüktsü.
“Ticket meyiptsünertemi pei phone nung 139 nung dail sür parnok meyong confirmed ticket nungi nüngdakaba osang nemoktsütsü aser iba sülen parnok dangi one-time password (OTP) ka yoktsü. Iba sülen iba nüjisa ticket ayokba tesem (counter) tonga oa iba OTP ji sayur sen meyipa meshitettsü,” ta Railway Ministry nung ketdanger tain kati metetdaktsü.
Inyakyim melenshiba sülen passenger aikati atakteta aliba mapang tsüngda nung ticket ayokba tesem tonga oa ticket memelentepteter aser ibaji ajanga parnok sen amajok nung lalur akümer.
Tan lemtet tasenba ajanga railway department-i ticket meyiptsüba taa mezüng agia aliba anasü agitsü ajisüaka ibaji ajanga teyari nüngdaka aliba passenger tem nem teyari agütsütettsü.
“Ticket meyiptsür sen meyipa agütsüba temzüng ya agent temi ticket ‘black market’ süa amshiba ajema kümdaktsütsü mechi nung latetba lir, ajisüaka shitakba nüngdakba pur kar asoshi timtem adoker. Anungji onoki item timtem ajema kümdaktsütsü asoshi 139 number ya agütsür,” ta pa ashi.
Kanga ariteper passenger tem yaritsü asoshi onoki 139 number agütsür aser ibaji ajanga ticket meyiptsünertemi ticket ayokba tesem tonga motetaka parnok indang confirmed ticket cancel sütettsü.
Iba den külemi online nung aliba ticket tembo kasa website ajanga cancel sütettsü. 139 yabo ticket aliba tesem nungi alirtem asoshi dang lir.
Iba indang software ya renema lir aser April ita tanabuba hopta nungibo mapa akümtsü imlar.