PHQ-i osang tejangja metetdaktsütsüla

Dimapur, Mongputeni (October) 19 (TYO): September 1, 2018 nü New Police Reserve, Phesema nung tongti police ketdangser ka kidang nungi brown sugar seret 6.9 anguba osang angashia kanga aoksar aser ketdangser kari iba ken o mimbangtsü merangba atema süngmanger ta ACAUT Nagaland-i ashi.
Tasütait aser ochishir police ketdangsertemi pei den temaba jenjang nung aliba ketdangser ka ki mita aotsü mulungtetba atema tenüngsang agütsür. Ajisüaka, kasa mapang nung iba ken o mimbangtsü merangba atema shisabulur aser police-i tang ya mapa shitak meinyakra, tarutsü nung tetsükdaktsü tulu ajurutsü ta ACAUT-isa metetdaktsü.
Ki mita oa aoba police ketdangseri mebilemdangi aser ozüng mejangjai iba mapa inyak ta Nagaland sorkari tai tongloktsütsü merangba ajanga parnoki aibelenba police ketdangser kümzüka ayutsü merangba jungkai adoka sayur. Ajisüaka, shitakba nungbo tongti ketdangserji police mapa nungi anentsütsüla, ta parnoki ashi.
PHQ-i iba ken o atema nübortem nem telangzüba agütsütsüla aser mezüng nung parnoki bushisüngdang metembang tashi kechiba police ketdangser (aibelensang) mapa nungi manentsür ta asüba lir.
August 3, 2018 nü Khuzama nung apuba brown sugar ji kaket nung shitak züluoka lir asü mali aser iba dak sendakba nung FIR ka benok asü mebenok’ar PHQ-i osang tejangja metetdaktsütsüla, ta ACAUT-isa metetdaktsü.
Police ketdangser jagi pa den temaba ketdangsertem dang par kidangi brown sugar bener aotsü atema temelaba meshi asü memeshi aser Khuzama check post nung apuba mozü shibelenertem tang dang tepuokdak lir asü chioker’ar item osangjia ashitsüla, ta parnokisa shisem.
Iba ken o ya kanga dang tulu ka lir aser iba jagi tanga teshimtet telok ka nem bushisüngdang asütsü atema nungloktsütsüla ta onokibo bilemer, ta ACAUT Nagaland-isa metetdaktsü.