Phuc-i Vietnam Ato Kilonser menden abentsü tenangzükba agiogo

Vietnam yimtiba, Hanoi kübok Parliament kilung nung Nguyen Xuan Phuc (Tiyongtsü)-i Vietnam Ato Kilonser menden abentsü tenangzükba agiba noksa nung angur. (Hanoi, April 07)

 Hanoi, April 07 (Agencies): Vietnam parliament yimsüsürtemi par vote agüja shimba sülen Nguyen Xuan Phuc-i Vietnam Ato Kilonser tasenba inyaktsü tenangzükba tanü, Brehostibar nü agiogo.

Vietnam indang yimsüsütsü tashi abenba Communist Party yimtenren teloki taküm January ita amenba Congress senden nung Nguyen shima liasü aser taoba mapang shimba ama, Phuc-i tanü nungi tenzüka Vietnam Ato Kilonser menden abentsü tenzüker lir.

“Vietnam linük, nübur aser Socialist Republic of Vietnam linük temzüng bendanga agüja tenzüktsü ta ni linük wako, National Assembly aser Vietnam nüburtem jakdang nangzüker. Ozü yimtenren telok, Vietnam sorkar aser nüburtemi nungloktsüba ama, ni kü tajungtiba agüja kü mapa inayaktsü nangzüker,” ta Phuc-i Ato Kilonser menden abentsü tenangzükba agidang metetdaktsü.

Tanü tenangzükba agiba sülen arishi küm 61 tain Phuc-i Vietnam madak küm 10 shi yimsü asüba sülen Ato Kilonser menden toktsüsang, Nguyen Tan Dung melenzüka Vietnam lenisütsü menden agizüker lir.

Dung-i Ato Kilonser menden abendang bendanglen tentetba shishilembatsü tentettemi par linük shishilembatsüsa Vietnam nung rongsenren temelenshi tajung agiba, South China Sea den sentakba mangatettep ken o nung China anema nokdakba aser United States linük den tesendaktep junga yangluba osang bushitetogo.

Phuc-i Communist Party Secretary General, Nguyen Phu Trong aser Vietnam Tir, Tran Dai Quang na den aroki lungjemer par Vietnam linük madak yimsü asütsü.

Taküm January ita agiba Communist Party Congress nung Trong-i Nguyen Tan Dung den temaba jenjang ngua yimsüsür 19 densemba Politburo Secretary General menden abentsü jenjang angu aser pai Secretary General menden abentsü tenangzükba taoba hopta agia liasü.