Pi mapa inyaker masü saka mapa agütsür ka kümang:Azo

Hokolbarnü Phek Village community Hall nung MLA Kuzholuzo (Azo) Nienu-i Phek Students Union  58 buba lokti senden den repa khenü amungba career guidance sentong nung o jembiba yangi noks anung angur. (Phek, Jan 6, 2016)

Phek, January 06 (TYO) : Tanü Hokolbarnü Phek Village community Hall nung MLA Kuzholuzo (Azo) Nienu-i Phek Students Union session 58buba den repa khenü amungba career guidance seminar lapoktsü.
Iba sentong nung jembiba mapang Neinu-i yimtaklirtem aser kaketshirtemi iba sentong aser inyakyim melenshia tongti tesemdanger mejaoki Career Guidance aser Confidence Building nung ajemdaker o jembirtem aser shisalen tuyurtem ang jaoka amungba atema tenüngsang agütsü.
Asen Naga lokti nung asenoki temelenshi aruba matai asen sasa temelenshi bener arutsü nüngdak, ta pai ashi.
Pai, Naga nunger lanurtemi peisasa pei peria alitsüsa inyaka shishilembar tetsüti aser pei inyakba nung mongin akümtsü nüngdak. Kodang yamaji inyakdir state rangben rongsenkettsüng nung temelenshi tulu adoktsü, ta ashi.
Pai, “Nai mapa mongutetra nüsasa mapa yangluang,” ta ashidang, Naga nunger lanur shia sorkar mapa dak temulung lemer makazüi pi mapa inyaker ka masü saka tangar nema mapa agütsür kaka akümtsü mapang tongja tongogo, ta shisem.
Nija mapa mesüra entrepreneurship ji mapa adokdaktsütsü atema sabi lir. Ibaji ajanga mapa mangurtem asoshi lenmang lapoktsü aser sensak tia tebilemtsü koktettsü. State nung tang mapa manguba tebilemtsü ulura akümba mapang ka nung tangar teyari magii lenmang patetba ajanga tebilemtsü koktettsü. Anungji asenok shisatsü nungi sorkar mapa atema bilemba agientsüla aser iba melena entrepreneurship mesüra corporate nung ajemokba ajanga tarutsü asoshi teimla tulu bener arutsütsü, ta paisa ashi.
Iba sentong nung shisalen tuyurtemji District & Session Judge Zunheboto, Niechochiyi S. Venuh aser Royal Foundation School Phek nung Managing Director Dr. Kuvezochi Hoshi na liasü.
Iba sentong lapokdang Kuthovo Chizo menden asü, Phek Village Council Chairman Chivozo Soho-i tepela o jembi aser Phek Collegiate Forum nung Tir, Vekhopu Venuh-i tarurtem pela agizükba o jembi.
Iba sentong ya Phek Village Council-i sen nung yaria Phek Collegiate Forum aser Phek Students’ Union na senteper ayonga liasü.