Pilgrim Higher Secondary nung Seminar ka agi

Dimapur, Mongputeni/October 28 (TYO): Zünger mapa mongui aliba lanurtem atema mapa inyaktsü asoshi maongka agütsütsü nükjidong nung Pilgrim Higher Secondary nung October 28 nü Employment Opportunity dak sendakba nung Seminar ka ayongzüka kaogo. Iba seminar ya class 11 & 12 kaketshirtem atema katsüogo aser Emporium Skill Training Institute nungi shisalen agütsürtem jaoka liasü.
Emporium Skill Training Institute, Director, Operation, India & International Anirban Mukherjee-i,par company-i state sorkar aser India sorkar den longjemer inyakba maparen balala indang metetdaktsü.
Paisa, class 12 tatidang agütsür alirtem nem angati agi anogo 90 tashi training agütsüba metetdaktsü. Interview agiba sülen shimba candidate tem nem Aviation, Hospitality aser Cruise Lines atema training agütsür ta pai ashi.
Iba inyakyim ya PMKVY küboki aiter aser tang tashi nung Nagaland nungi lanur meyirejang tenet dak tema nem mapa agütsüogo, ta Anirban-i ashi.