Pilgrim Higher Secondary school asayamung takok nung tembangogo

Dimapur, Yimpoksüi/November 6 (TYO): 31buba Pilgrim Higher Secondary, Dimapur annual sports meet, November 5 aser 6 nü school ground nung asayaogo. Iba asayamung nung school nung kaketshirtem aser tsürapur/guardian temi shilem agia liasü.
Mezüngbuba anogo asayamung lapokba sentong nung principal Kaini Khekho Kikon-i lokti pelaa agizükba o jembi. Sentong nung alakteta jaoker, Additional Commissioner of Taxes, Dimapur District, Government of Nagaland, Wochamo Odyuo-i school wako atsükettsüba den march past contingent tem nungi salute agizüka liasü.
Iba sülen asayamung nung shilem agirtem den o jembiba mapang alakteta jaokeri Nagaland nung school tem rognung premier school ka asüba aser jenjang aketba education agütsüba atema school tenüng asang. Pai Naga nunger kaketshirtem tejakleni maoba ya peisasa dak tamang makatetba aser mapa inyaktsü atsüzüka ayuba ajanga lir, ta ashi. Maneni paisa, bendanga agüja meranga inyakba ajanga teti tajangzük angur, ta ashi.
Asayamung tatembangbuba anogo saisapong balala asayaogo aser Green Hornet House pur overall champion liasü. Maneni asayamung shibangba sentong nung Pilgrim Hr. Secondary Administrator, Bithungo Kikon-i tajungshi o jembiba mapang Thomas Edison aser Alexander Fleming nunger tateshitsü amshi, takok mangu tashi metoktsüi inyaktsü kaketshirtem ajungshi. Paisa school wakok atsüzükja asayamung tembangba sangdonga liasü.