Pistorius nem tepuokdak küm 6 ayutsü temerenshi agütsür

South Africa nunger paralympian, Oscar Pistorius (Tiyongtsü)-i pa anema benokba ken o angadangba sentong nung shilem agitsü asoshi South Africa kübok Pretoria nung tentetba High Court tonga aodang agiba noksa ka yangi angur. (Pretoria, July 06)

 Pretoria, July 06 (Agencies): Okadaki South Africa nunger paralympian, Oscar Pistorius nem tepuokdak küm 6 tashi puoka ayutsü temerenshi tanü, Bodbar nü agütsüogo.

Küm 3 tejaklen tedong, Reeva Steenkamp tepsetba ken o nung aitsüba sülen okadaki Pistorius tan merenshir lir.

“Pistorius-i temulung shiranga sasaba, pa nem mezüng temerenshi agütsüdang pa tepuokdak amongba aser tedong tepsetdang pai taila tetsüng mesenloka maliba reprangshir külen Pistorius dang taochi sayua, pa nem agütsütsü asoshi benokba tepuokdak puoka ayutsü temerenshi küm 15 nungi küm 6 küma ajemtsüogo,” ta Judge Thokozile Masipa-i osang jangjashitsü.

2013 küm Valetine’s Day anogomong aonung ozüng alema kilungi aiter ta bilema, pai shibanga aliba bathroom kishi adena injang 4 tashi kaloktsüba sülen tedong, Steenkamp memeteti kaset ta pa anema benokba onük okadak angadangdang Pistorius-i metetdaktsüba osang angazükogo.

Law nung graduate sür model akümtsü lenmang bushia alila, Steenkamp tedong, Pistorius-i kasetdang la arishi küm 29 tain liasü.

Memeteti nisung tepsetba ken o nung aitsüba sülen Judge Masipa-i Pistorius nem küm 5 tashi tepuokdak puoka ayutsü temerenshi 2014 küma agütsü saka Pistorius-i tepuodak küm 1 shi amongba sülen pa parole nung 2015 küm October ita chiok.

Ajisüaka, appeals okadak kati ken o tanaben angadangba sülen Pistorius memeteti nisung tepsetba masü saka metetsümonga nisung tepsetba ken o nung December ita aija liasü.