Piyas jenjang shilem 10 agi tali atutsü

Mumbai, August 24 (Agencies): Linük tesem aika nung piyas seret nung sen 80 agi yoktepdar saka taküm tzünglu ajanga timtem agütsüba ajanga alu nung tsünütsütem aika junga madokba agi iba jenjangji noklang nung shilem 10 agi tali atutsü akok.

“Tarutsü mapang asoshi tebilemtsü tulu lir kechiba süra tang alu nungi adokba piyas temji tzünglu ajanga timtem agütsüba ajanga noklang nung shilem 10 tur ayoktsü akok,” ta Bombay APMC Director Ashok Valunj-i PTI dang ashi.

“Pakistan nungi mangaba piyas bo linük tongogo aser Egypt nungi mangabajibo taruba hopta nungang atongtsü ajisüaka item jagi jenjang ajemba nung kangabo meyaritsü,” ta pai metetdaktsü.

“Piyas tonne 30 aliba pongdang 100-200 tashi mangabaji linük tesem ajak nung alemtsü. Anogo shia Mumbai mesüng nung piyas tonne 12 aiba truck gari load 80-100 tashi agir. Linük nungi adokba piyas kanga kara agimaogo anungji tanga linük nungi mangaba ajanga sen jenjang ajema akümba nung meyaritsü,” ta paisa ashi.

Lasalgaon, Maharashtra nungbo piyas wholesale seret ka nung sen 60 agi agütsür aser retail ajanga sen 80 agi ayoker.

Deobar nü Mumbai nung sen 50,000 alang piyas seret 700 shi auyar ao, ta police temi metetdaktsüogo.

Nashik tesem nunga aluyimer kati par kidang nungi piyas seret 2,000 shi auyar aoba Nandgaon police nem metetdaktsüogo.

Taküm linük nung piyas kanga ajema adokba ajanga hopta ishika sorkari kanga azüoktsü merangaka mokoki wholesale aser retail market nung piyas jenjang kanga tuogo.

2014 July nungi 2015 June mongpu tashi nung linük nung adokba piyas ajak agi tonne lakh 189 liasü ta asadangtetogo.

Tesüiba mongpu nungbo linük nung piyas tonne lakh 194 adoka liasü.

Centre-i tanga linüki piyas yokba jenjang tonne ka nung US sen 425 aliba US sen 700 kümtsüogo.

Sorkar meyong shishilembar MMTC-i piyas tonne 10,000 tanga linük nungi mangatsü atema tender süteptsü maongka lapoktsüogo aser iba tender ya August 27 nü tashi lapoka alitsü.