PKL nung Pakistan nunger masayadaktsütsü

New Delhi, May 22 (Agencies): Sorkari Hombarnü taruba ita Pro Kabaddi League (PKL) tenzüktsü aliba nung Pakistan nunger-i kiralongrar yariba manen tashibo parnok asayartem masayadaktsütsü ta jangjangja metetdaktsüogo.
Iba league 5buba season June 25 nungi tenzüktsü. Mezüngbuba asaya nung Punei Paltans aser Telugu Titans na Pune nung asayatsü.
Osang ajanga ashiba agi, iba league atema asayartem auction asüba nung Pakistan nunger asayartem den züngsemtsü.
“League ayongertemi parnok ajatsü akok saka parnoki parnok masayadaktsütettsü. Parnok asayatsü asoshi shimaka parnok arudaktsütsü asü marudaktsütsüar ajibo India sorkari telemtetba agitsü. Pakistan nungeri kiralongrartem yariba manen tashibo parnok den asayatsüji tamakoktsü lir,” ta Sports Minister Vijay Goel-i ashi.
Pakistan nunger hockey aser cricket asayartem mapang tatsüka atema India nung masayadaktsüi arudar. Pakistan military court ajanga taoba ita Indian nunger Kulbhushan Jadhav südaktsütsüba ozüng agütsüba sülen linük ana tsüngda tesendaktep tamajungba kümogo. Jadhav ya taoba küm March 3 nü apu. Iba telemtetba India-i International Court of Justice (ICJ) nung benok aser iba court ajanga pa tepsettsüba maparen anena atatsü asoshi tetuyuba agütsü.