PL: Conte-i Manager of the Month naroküm ajangzüker

London, November 18 (Agencies): Britain linük nung ayonga asayaba tongti football asayamong, Premier League (PL) nung shilem agir telok, Chelsea nung manager inyaksang, Antonio Conte-i taoba October ita indang PL Manager of the Month naroküm tanü, Hokolbar nü ajangzükogo.
Conte lenisüba kübok par Chelsea teloki taoba October ita asaya 4 tashi atonga akokba nüngtem nung PL-i Conte tan tushir lir.
Conte’er Chelsea teloki taküm September ita point 1 dang ajangzüka liasü saka par asaya tasa melenshiba sülen Chelsea teloki taoba October ita nung ajak agi goal 11 tashi agüja, asaya 4 prongla nung takok ngua liasü.
“PL Manager of the Month naroküm agütsüba atema kanga pelar aser iba naroküm ya ozü telok aser asayartem den lemsateper,” ta Italy nunger Conte-ia metetdaktsü.
Taoba October ita takok ngua asayatsü tenzükba sülen Chelsea telok PL telok tarensen nung 2 buba jenjang ajangzüka, temaba jenjang nung alir, Liverpool telok point 1 agi memenepi lir.
Chelsea teloki par taruba asaya 15 buba jenjang nung alir, Middlesbrough telok den Riverside Stadium nung tan Deobar nü asayatsü lemzüka lir.