PL: Manchester teloki goal 4-1 agi Leicester akok

Manchester, September 24 (Agencies): Manager Jose Mourinho-i aniba Manchester United teloki goal 4-1 agi defending champions, Leicester City telok madak takok ngua, tang tasayadak Premier League (PL) asayamong nung tanü, Honibar nü shilem agiogo.
Mourinho-i Wayne Rooney captain menden nungi tanü anendaktsü saka par asayartemi kanga junga shilem agiba ajanga par teloki tanü asayaji koka liasü.
Rooney melena captain menden abensang, Chris Smalling-i 1 buba goal agüja par United telok temaba jenjang nung ajungkettsüba sülen Juan Mata, Marcus Rashford aser Paul Pogba nungeri asaya mezüngbuba shilem nung minute 5 tsüngda nung goal 3 tashi agüja par United telok nem takok ngudaktsü.
Tan goal agütsübaji otsüsütsüsa sen timtiba agizüka, United asayar akümba sülen Pogba-i tan mezüngsüa par telok tenüng nung goal takok ngua agütsür lir.
Tanü asaya nung substitute asayar, Demarai Gray-ia yard 20 talang nungi ball metsüokja, minute 29 buba nung par Leicester telok asoshi goal 1 agütsü saka par teloki tanüngba asaya mapang nung tanüngba goal 3 memeyiptsütetba yong par teloki tanü tamakok ajurua liasü.