Plastic mamshiba temoatsü

Tang ya alima nung nisungtem kümzüka alitsü asoshi arrsangokja inyakba mapa ana lir. Kaji alima nung
takümtem tali majungtsüsa tzü mopong tsüka mekümdaktsütsü asoshi inyaktsü rongdaknüngdakba aser ano kaji plastic mamshitsü asoshi kanga süoki ia ajungshitepba mapatem ya asütsü. Mapa ana ya sendaktepba lir, kechiyong tanü putu nung nisungtemi plastic amshiba ajang ali tema aser telong dang masü saka tzüyim nung aliba takümtem dena melitettsüsa akümer. Atangji, tanü putu ya plastic putu ta ajatsüsa asenok nüngdak asoshi plastic amshiba ya onsara nungji, joko plastic mamshiibo taküma junga melitettsüsa asenoki bilemer. Plastic jenjang ya dalang aser tepongba anungji ajaki alitetter. Joko, plastic agi ki jara, kilem aser tsüngbang yanglur alir aser plastic agi yangluba kioset agi kilong nüngdak peridaktsür. Ibaji dang masü saka gari yangludak aser mozü kitem nung plastic agi nüngdakba osettem yanglubatem tejen kümer nisungtemi endok dang, iba jagi ali tema dang masü saka tzüyim telong dena janar. Aji oda, tang amai kiyir benjongbentsü alidang auso marok nungi shir tzü ajemba bottle tashi plastic agi yangluba amshir. Aji dang masü, saka ano asenoki anogo shia dokan nung shishilemba dang dokan kiburi asenok nem oset enoker agütsüba polythene bag ya asütsü. Item plastic osettem agi asenokia ngua asen lima janar aser itemji tesüsa ali aser tzüyim telong nung nangdener, kechiyong plastic yabo ali küma shizüka maor. Iba timtem jagi ali telong nungi süngdong junga meyia matutetter aser ali tema nungi tzü yimoka meitetter aser ano tzüyim nunga taküm melitettsüsa miim adokdaktsür. Item timtem aser takoksa tulu atalokba ngua joko alima ajunga nung akok tashi plastic mamshitsü telemtetba agir. Asenoki kodang itemji jungjunga bilemdangdir, asenok asoshibo plastic mamshibaji temoatsüang asütsüsa asenoki inyaktettsü lenmang aika lir. Plastic mamshidaktsüba ajanga tangarbo kanga akoksatsü saka asenokbo makoksatsü, kechiyong asenoki plastic amshia kecha meyanglur saka tangari yangluba dang alia agir. Iba tangatetba nung asenokia plastic agi yangluba osettem melenla kechisa yanglutettsü ta talisa lanurtemi bilemdangtsüla. Joko, asenok tebilemba aser nükjidong ajunga agi government mapa bushitsüba ya masütsüla. Asenok dak aketba kolok, sempet aser tashi apibo government mapa ya kanga ilara, anungji government mapa inyaka ita sen chia alitsü bilemba shisatsü dang nungibo kanga agia tuluba bilema asenoki asenoksasa nübortem nüngdak ataloktsütsü merangtsüla. Tangbo asenoki plastic agi amshiba molok, auso aser marok amshir saka itemji melena asenoki yong agi nüngdak ajak nung amshitettsüsa molok takdaktettsü aser süngotu agi mesüra am agi auso marok kanga junga yanglutettsü. Atangji, itemji akhi ama teka kija agi yanglutsü mebilemtsüla, kechiyong tanü nüngdak ulura aser inra anungji itemji tongtsütsüla. Joko yong ayatsü dena machine bener arutsüla aser auso marok-temjia machine agi yanglutsüsa lenmang bushiteptsüla. Tanü ama putu nung süng, aou aser süngo tu agi yangluba auso marokji raktepa alitsü. Item osettemji yanglu angazüktsü asoshi lanurtemi peisasa lenmang bushia oagi angazüker arutsüla. Atangji, state government-ia yaritsü saka asen atema tang aser tarutsü asoshi inyakba mapa nungbo government nungi teyari matatsüla. Tanü company tululu lapoka aliba ya government teyari ajanga lapokba masü saka pei tejangraba aser nübortem nüngdak reprangtetba agi tila kati tenzüka tuluba küma inyaktetba mapatem lir. Kodang asenoki asen lima nung plastic melena amshitsü asoshi nüngdakba osettem tapu balala yanglu tenzükdir, plastic osettem arubaji parnoksasa anenadoktsü. Iba jagi asenoki asen nübor aika nem mapa aser rongsen agütsütettsü. Tatishitsü agi, auso kisüng yanglutsü atema kibong aikati am lu ayimtsüsa akümtsü, iba amaji aou aser süngküm lu ayim tenzüktsü. Idangjiang nisung shinga azünga malitsü. Item ama temoatsü angutsüba mapatemji Naga lanurtemi yakta tenzükadoktsüla.