Plastic mamshitsüla

Alima nung plastic ajanga oset tapu balala yangluteta amshiba ajanga nisung kanga anisüngzüker. Kidanga aser lokti nunga nüngdak atema amshiba osettem auso aser marok nungi tenzüker menden tashi plastic agi yangluba amshir. Ano, shishilembadaka osettsüset , süoshi aser chiyongtsü aika aliaka, itemji plastic/polythene yangku nung enoker agütsür asünungji belenshibenratsü atema ayongayonger. Aji oda, plastic agi yangluba nüngdak osettem amena alir itemji plastic yangku nung abentsüsa yanglutetba temoatsüji dang masü saka plastic agi yangluba osettemji jenjang dalang aser ano plastic yangkujibo angati angur. Ajisüaka, tanü anguba temoatsü agi asüngbo asenok asoshi timtem takoksa angutsüsa akümtsüba mapa kaji plastic agi yangluba osettem amshiba ya ka asütsü. Ibayongji, ano tangbo alima ajunga nung yimteni nübortem dang akok tashi plastic agi yangluba osettem mamshitsü asoshi tangatetba agütsü tenzükogo. Iba tangatetbaji alima asoshi nükjidong kümer, taküm küm June 05 nü alima ajunga nung lipuküm amongba anogo omen, ‘Plastic agi alima menentsüba timtemji akoktsüla’ ta shimteter mongogo. Jenjang dalang agi nüngdak oset ajak terenem anguba plastic osettem agi alima tzü mopong menentsür ta asübaji asenoki mangatettsüa akok, saka taoba küm ishika tsüngda nisungtemi plastic oset teraksa, tamagitsü aser plastic yangku (plastic /polythene bags) tejentem endokba ajak shizüka moi odang nangdena lir aser teimbaka item plastic-temji ayong aser tzüim telong nung nangoker. Iba jagi tzü menendaktsür aser yangji aliba tzü shirurutem taküm junga melitettsüsa akümer. Ibayongji, tangbo tzüim nung aliba ozütem rongnung 90 % dakbo temang nung plastic keter aliba puettter. Iba amai nübortem nembo anisüngzük tulu agütsür ser nung kechiba plastic amshiba ajanga takoksa angur ta süra, plastic ya tejen kümaka kodanga shizüka maor. Tanü putu nungbo tzü ajemtsü asoshi zübazübar, kechiyong telok tulu süaka tzü tajemtsü bottle nung enoker angur. Ano, auso marok aser spoon aser fork tashi plastic agi yangluba terenem angur. Ajisüaka, asenoki jemer endokba bottle taküptsü dena aser plastic aser thermocol agi yangluba auso aser maroktem aser polythene bags ya kodanga shizüka maor, anungji parnokji ali aser tzü telong nung nungdenaka shizüka moi alir. Asenok alidak, talisa, town-tem nung yimteni jana endokdak reprangra, item tesemtem nungji plastic osettem tejen aser teraksa nungtenba ajanga ali telongleni tzü meitet takong angutsü. Ano, asenok asoshi plastic arongbajisa tamajungba, kechiyong idak nung jagi miim adoker. Iba ama timtem agi ali temadak tzü mopong menena asenok timtemdaktsüba dang masü saka tzü telonglen tzü shirururtem aika plastic agi chiyongtsü kümer aliba ajanga taküm aika samaa odagi. Iba ama plastic ajanga timtem takoksa anguba indang tangatetba agütsütsü merangba mapang ka nung, Mokokchung nunga Clean Mokokchung Campaign telok tenteta nübortemi pei alidak merüka ayutsübaji dang masü saka plastic melen amshir endokaka shizüka aotsüba osettem yanglua amshitsü tayongzükba agüja senzübaji junger ta repranger. Aiben asenoki nübortem inyaka aliba mapa aser sobaliba nung tamajung aser takoksa reprangteta aitsür aser mamshitsü ajungshir, saka item temelenji magütsütetter, iba jagi majunga ta metetyonga amshitsüsa akümer. Ajisüaka, Clean Mokokchung Campaign purtemi sayuba ama asenoki asenok nüngdak osettem plastic melena süng aser aou, süngküm aser süngo tu agi yanglua amshira, iba jagi asenoki asen alidak tzü mopong kümzükba dang masü saka senotsü ajangzüktsü lenmanga ngutettsü. Aji oda, tanga ama alima nung plastic agi yangluba osettem mamshitsü ajungshitepdang, asenoki asen lima nung anguba aou mesüra süngo tu agi marok, auso, jamos aser fork yanglura aser newspaper tejen aser sü agi shishilembadak amshitsü yangku yanglua ayok tenzükra, khen nung asenok alidak plastic mali akümtsü aser nisung aika peisasa inyaka takar akümtsü lenmang ngutettsü. Ano, temetettsü kaji, plastic osettem nung chiyongtsü achibabo miim chisemtsü saka aou aser süngo tu agi yangluba marok aser auso nung chiajembajibo temang asoshi tajangzük dang asütsü.