‘Plastic’ masü ‘Fortified’ jang ta kuli bushitetogo

Figure-I aser Figure-II nung sayua aliba ama fortified rice kernels aser non-fortified rice kernels tereprangtsü balala asüba angur. Non-fortified rice kernels nung endosperm ajanga embryo ajiteta lir saka fortified rice kernels nungbo ibaji mali.

Dimapur, June 21, 2021 (TYO): Taoba hopta Dimapur nung ‘plastic’ jang ta asüba jang Food Safety Officer, Dimapur-i State Public Health Laboratory nung tendangtsü atema bener yokba osang tanü nguogo.
“Food Analyst report ajanga ashiba agi jang nung ‘fortificants’ enoka lir aser iba ajanga ‘plastic’ masü saka ‘fortified’ jang indang kuli agütsür” ta Principal Secretary & Commissioner Food Safety, Amardeep Singh Bhatia IAS-i Hombarnü metetdaktsü.
Food Analyst mongintemi iba jangji jungjunga reprangdang oryza sativa species (natural rice origin) indang rice starch aliba bushitetogo aser video nung plastic jang meyoktepa lir ta ashiba kuli kecha mengutet, ta Amardeep Singh-isa ashi.
Taoba hopta belenshiba video nung jang tapu balala ana sayudang ‘plastic rice’ ta ashi saka jangji fortified rice kernels aser iba ajanga tereprangtsü balala lir, ta paisa metetdaktsü.
Food Safety & Standards (Fortification of Foods) Regulations, 2017 kübok Fortification of Food melar aser dusting, coating mesüra extrusion technology ajanga jang nung vitamins aser minerals enoka tashi itshidaktsür.
Food Safety & Standards (Fortification of Foods) Regulations, 2017 kübok fortified food indang package ajak nung “fortified with….. (name of the fortificant)” aser logo (Plus F) enoktsü lateta lir.