Plastic nokdangba indang awareness sentong ka agi

Kohima, September 26 (TYO): Brihostibarnü Kohima DC Conference hall nung Kohima Sadar jurisdiction kübok yim asem atema plastic free environment aser single use plastic nokdangba indang awareness programme ka ayongzüka agiogo; iba sentong ya SDO(C), Kohima Sardar office-i ayongzük, ta ketdangsertem osang ka ajanga metetdaktsü.
Okila jembidang SDO (C), Kohima Sardar, Longasen Lotha-i, sorkari single use plastics ajak nokdangtsü atema tuyuogo aser plastic maliba libajen ka akümtsü atema maparen inyakdar, ta metetdaktsü.
Paisa yimtsüngtem nungi yimsüsürtem aser lanurtem dang iba atenokdangba ya junga benoktsü atema teka amteper inyakba ajanga state aser linük dang tatishitsü tajung sayutsü ayongzük.
Paisa, iba atenokdangba ya süoki ia agia inyaktsüla, ajimesüra iba ya mapang aser senotsü amajok nung indokba dang asütsü, ta ashi.
Green Team nungi Akhrieu Meyase-i plastic ajanga tzü-mopung melenba ajanga ibaji ajanga atemang nung timtem balala agütsüba metetdaktsüba den külemi plactic ajanga tzü-mopung menentsüba nokdangtsü atema tebilemba kar lemsatep.
Laisa, “Asenoki plastic ajanga tzü-mopung menenba atema rara dang masü saka asenok taküm alitsü atema inyaker. Kohima nung sensotemi iba khuret agia longjemer inyaktsüla, aser plactic agi tzü-mopung menentsüba anema asenoki akokba alenmang ajak agi yaritepa inyaktsüla,” ta ashi.
Iba dak snedakba nung lai ‘Rule of 3 ‘R’ lemsatep aser itemji- Reduce, Reuse aser Recycle lir, koba ajanga plactic maliba libajen ka akümtsü nükjidong ataloktsü.
KVYO Tir, Dzuvinguzo Mephuo-i otembang jembi aser pa den yimtsüng asem nungi yimsüsürtem aser lanurtemi October 1 nungi tenzüka Kohima Sardar kübok tesem ajak nung single use plastic nokdangtsü atema tenangzükba agi a liasü.
Iba sentong ya KVYO tatong Tir, Zhakuo Whuorie leniba nung agia liasü.