Plebiscite agishitsüsa akümer !

Taoba hopta nung asenoki ” Naga yimten tebilemtsü ya tatem küma latettsü atema plebiscite ano khen agishi nunga koma süla ?” ta asüba tasüngdangba nung bilemdangogo. Iba jagi asenok ajak nem Naga yimten asoshi inyaktsü khuret kakabo agütsür asütsü imlar. Atangji, Naga National Council leniba kübok 1951 küm May 16 nü Naga nunger yimten nüjiso angutsüla ta asüba yimten onük latettsü asoshi Naga nunger ajaki shilem agia temeyong nema plebiscite agiogo aser Naga nunger ajaki Naga nunger yimten nüjiso angutsüla ta asüba temeten aser Yimyim pusema temeyong nemogo. Ibaji Naga nunger asoshi yimten nüjiso latetba anogo liasü. Ajisüaka, asenok asoshi tia majung kaji asenoki ajaki mulunga lemtetba telemtetbaji alimai magizük, anungji mapa küma moutet. Iba jagi tanü tashi asenok yimten nüjiso bushir. Tangbo, joko Naga yimten nüjiso asoshi India den jembidang plebiscite agiba indangji mejembir, iba jagi Naga yimten latettsü asoshi tasakba tasakba akümer. Aji oda, shitakba Naga nunger asoshi yimten ka latetdi ta asünungbo plebiscite ano ken agishitsüsa akümer. Iba jagi dang Naga yimten tebilemtsü onük ya Naga nunger ajaki mulungba nung mesütettsüka asünunga teimbai mulungba nung latettsü. Koba lima aser koba yimten südir süaka nübortem dang masüngdangi aser parnok nem shilem magidaktsüi pei yimten jenjang ka latettsü makok. Anungji, Naga nungertema yimten tebilemtsü tatembang küma telatetba kati arutsü atema senso ajaki shilem agia plebiscite mesüra referendum agiang tajungba asütsü. Iba telemtetba agiba mapang ano tanü tashi Naga nungertem 1951 küm agiba plebiscite telemtetba nungtosa nokdaka lir asü (?) mesüra tang NSCN-IM teloki jembiba ama India den yimten tashi lemsatepa (shared sovereignty) alitsü mulunger (?) ta asüba onük nung telemtetba agitsüsa adoktsüa akok. Atangji, ibaji atema tamasa Naga nunger yimten nüjiso bushir telok ajak temang ka küma melongjemtetaka, kenbang obangbo medemtsüla aser iba ama tanü tensa dak apet yimten ken o benoka nübortem nem telemtetba agidaktsütsüla. Iba amaji ka meinyaktetra, telok ka kijai jembiba aser telok kati bener aruba telemtetba nungji Naga nunger yimten tebilemtsü metembangtettsü. Asenok joko akhidang amato India den kenyongi balaka razüka orr yimten nüjiso jenjang ka latettsüba nükjidong nung inyakerbo mali kümdagi. Anungji, anosa Naga yimten nüjiso asoshi akangakanga nokdaka lir amato mesayu tajungba asütsü. Iba amaji asenoki ochishia mejembitetra aser meinyaktetra asenoksasa asenok ashioktsür asütsü. Atangji, akhi yimten tangatetba jenjang nungi asepzüka alur asünungji iba ken o ji lapoka ashitsübaji telok ka kija asoshibo tasak asütsü. Ajisüaka, telok ajak o lemtepba sabang kati arutetra, idakji yimten ken o tasak ajak benoka jembir Naga nunger asoshi tanü aser tarutsü asoshi tajungtiba telemtetba agitsü. Tang ya ajungbena ka dang August 3 nü NSCN-IM o India sorkar na tsüngda tangatettep ken o kar renemba ajanga FNR telok tebang ailen mali aküm südi. Ajisüaka, Naga yimten telok ajak jadena kenbang obang medemdaktsütsübo parnoksa tajungba asütsü aser parnokiang inyaktettsü amai bilemer. Aji shitaka ta bilemra, India sorkar o NSCN-IM nati kangabo maritepi FNR telok nem ano ken parnoki inyaktur aliba mapa renema inyakdaktsütsüla. Ibaji pusema Nagaland state sorkar aser Naga Hoho natia FNR nem nüngdak ajak agüja ajungshitsüla.