PM dangi shidi züluba atema Celebrity 50 anema FIR benok

Patna (Bihar), October 04 (Agencies): Bollywood actress Konkana Sen, director Maniratnam, Aparna Sen, Shayam Bengal aser Ramchandra Guha nunger densema celebrities 50-i yimjak nung shidi ka ajanga Ato kilonser, Narendra Modi dang linük nung loktii nisung tepsetba kanga bulua atalokba anendaktsütsü atema mepishiba asoshi Bihar kübok Muzaffarpur district nung parnok anema FIR ka benokogo.
District police ketdangsertemi ashiba agi, local court ka tetuyuba nung Brihostibarnü Sadar police station nung ken o ka benok.
Advocate S. K. Ojha-i Chief Judicial Magistrate court nung iba ken o benoka ken o angadangba sülen court-i police dang item celebrities anema FIR benoktsü tuyu.
Pai ashiba agi, iba shidi nungji celebrities 50-i sign süa lir, aser parnoki ashiba agi iba shidiji ajanga linük aser Ato kilonser tenüng menüktsür.
Celebrities-i shidi nung shia aliba agi, linük nung Muslim nunger, Dalit nunger aser tanga minority tem loktii tepsetba ya tangsa anendaktsütsüla, aser “Jai Shri Ram” ya rara ayongba oren ka kümogo, ta shia lir.
Iba dak sendakba nung Hokolbarnü Ato kilonser, Modi aser Central sorkar aija Congress lenir, Rahul Gandhi-i, linük ya kijai tashi amshiba lenmang jung jajadar, ta ashi.
Wayanad (Kerala) nung osangbenertem den jembidang Rahul-i, “Linük nung kechi atalokdarar ajaki meteta lir. Iba ya memeimshitet. Alima ajaki meteta lir. Asenok ya kijai tashi amshiba lenmang nung jajadar, aser ibaji tejangja. Ato kilonser aser sorkar anema jembirtembo tepoukdaki yoker,” ta ashi.