PM-i aluyimertem dang temeim sayutsüla: Rahul

Mahoba, January 23 (Agencies): Tzünglu junga maruba ajanga aluyimertem timtem ajangshia aliba Bundelkhand region nung tanü Congress tatong Tir, Rahul Gandhi-i, Ato kilonser Narendra Modi-i Industralist tem atema dang masü saka aluyimertem aser aayangertem atema-a bilemtsüla aser tangar memenepba tesemtem atema senotsü tali agütsütsüla, ta ashi.
Ato kilonser maneni aija Rahul-i, “Yashi asenoki Modi temelung shiaranga jembiba nguogo. O tejembitak nung pai anen, aser pa nük nung nüktzü liasü. Ni ya shiner, Modi, na achiba chiyungtsü,  menjang tanü sen 220 agi ayoker aser ibaji aluyimertemi nü nem agütsüba lir,” ta ashi.
“Ni Modi dang, aluyimertem, aayangertem aser sensakertem atema-a terabo bilemtsütsü asüngdanger, kechiyong linük nung industrialist temi dang masü saka parnokia shilem agir. Anungji parnok atema-a bilemtsütsüla,” ta Gandhi-i ashi.
Congress lenirisa tzünglu agi anüngba tesem atema senotsü tali lemzüktsütsüla, ta ashi.
“UPA yimsüsüba mapang petrol totzü tazü barrel ka nung US sen 150 liasü, saka tangbo US sen 28 tashi ajema aluogo. Iba nungjagi kümzükba senji Bundelkhand ama tangar memenepba tesemtem nung terenlok atema amshitsüla,” ta paisa ashi.
“Tebilemtsü onük ajakji ni Parliament nung süoka jembitsü,” ta pai Bundelkhand nübürtem dang nangzükogo.

You must be logged in to post a comment Login