PM-i Chattisgarh nung ‘Rurban Mission’ lapoktsü

Dongargarh (Chhattisgarh) February 21 (Agencies): Tanü Ato kilonser, Narendra Modi-i linük nung yimtsüng 300 nung Urban growth centre ama terenlok katsütsü atema ‘Rurban Mission’ lapoktsüogo.
Ato kilonser-i, par sorkarji sensakertem, dalit aser lokti nung tangar memenepertem atema lir, ta ashi.
Iba mission ya lanurtem jenti yimtsüng nungi jila aser yimtitemi oa aliba nokdangtsü atema lir ta shia pai, yimti aser jilatemi nisung jenti oa aliba ajanga timtem adokba atema shingaia sentong yanglutsü aser terenlok agütsütsü atema meshisadang, ta ashi.
Paisa ashiba agi, ‘Rurban Mission’ kübok rural centres 300 shia nung tajemba agi anasa aliba yim pezü densemtsü.
Chhattisgarh tezülen tribal aliba tesem nung iba scheme tenzüktsüdang Modi-i, India ama linük tulu ka nung yimtsüngtem nung terenlok melira India rongsenkettsüng merenloktsü. Item tesemtem nung shisaliok, anema alibaren aser internet ama facilities akatsüla, ta ashi.
“Iba sorkar ya sensakertem, dalit, adivasi aser lokti nung tangar memenepertem asoshi lir. Iba ya tesülen nokdakertem asoshi lir,” ta pai ashi.
Swaach Bharat aser Rurban Mission densema par sorkari benokba scheme aika metetdakja Modi-i, item scheme ajak ya sensakertem taküm jenjang nung temelenshi alitsü atema benokba lir, ta ashi.
“Linük ajangzüktsü lenmangji iba lenmang ya dang lir aser iba lenmang nung onok jaja tenzükogo,” ta pai ashi.
Taküm küm kija nung rural centres 100 nung terenlok agütsütsü nükjidong lir, item centre shia nung anasa aliba yimtsüng pezü nungbosa urban clusters ama terenlok agütsütsü, ta pai metetdaktsü.
Tanü iba sentong nung state Chief Minister Raman Singh aser Union Rural Development Minister Birendra Singh na densema tongti ketdangser aika liasü.

You must be logged in to post a comment Login