PM-i Congress, Pak indang jembiaka tongti onüktem mejembir: Rahul

New Delhi, Tsüklai/February 06 (Agencies): Brihostibarnü Ato kilonser, Narendra Modi aija Congress Party lenir, Rahul Gandhi-i, Ato kilonseri Congress, taoba mapang Ato kilonser, Jawaharlal Nehru aser Pakistan atema jembir, ajisüaka linük nung kanga tongtibang onüktem indangbo mejembir, ta aitsü.
Brihostibarnü Lok Sabha nung Modi-i jembiba sülen mapang tatsüka tsüngda Rahuli-i pa aija jembi.
Lok Sabha nung jembidang Modi-i Congress aitsüba den külemi Jammu & Kashmir nung Arrla 370 agienba, rongsenkettsüng aser CAA indang jembia liasü.
New Delhi nung osangbenertem den jembidang Rahul-i, “Tanü tongtibangtiba onükji mapa manguba tebilemtsü ya lir. Onoki Ato kilonser dang aiben asüngdangogo saka pai iba onük indang ojang ka danga mejembir. Tamalen Finance Minister-ia onük talangka jembiogo, ajisüaka lai-a iba onük atema ojang ka danga mejembi,” ta ashi.
“Ato kilonser Modi yimyaji, linük nüburtem tongtibang onük nungi piladaktsütsü atema lir. Pai Congress, Jawaharlal Nehru aser Pakistan indang jembir saka tongtibang onüktem atemabo mejembir,” ta Rahul-isa ashi.