PM-i Indian Science Congress tenzüktsütsü

Imphal, Aenjeti (January) 5 (Agencies): Prime Minister Narendra Modi-i Metsüremi (March) 16, 2017 nü Imphal nung 105 buba Indian Science Congress tenzüktsütsü ta sorkar sangdong ka nung metetdaktsü.
Anogo pungunü Manipur University nung amungba sentong nung India aser bendanglen nungi teshimtet nübo 5,000 nungi 6,000 shi ka adentsü imlar.
Taoba Sangtennü (Mongulbar) Manipur chief minister N Biren Singh-i cabinet hall nung iba mungdang indang official website (https://isc105.org/) sayaja liasü.
Manipur-i mapang talangka iba science congress ayongzüka agitsü yongya ataogo. Iba sentong ya Manipur nung BJP-i aniba sorkar küm ka ajungba den külemi amungtsü, ta Biren Singh-i ashi.
Manipur nung BJP sorkar kümteter Metsüremi (March) 15, 2018 küm ka abensatsü.
Northeast nung Shillong nung mezüngbuba amunga sülen Imphal nung tang agi tanaben atema Indian Science Congress ayonga amungtsü. 1914 nung mezüngbuba Indian Science Congress ayonga amung.