PM-i jembiba oji tagitsü mali: Rahul

Vidisha (Madhya Pradesh), Yimpoksüi/November 23 (Agencies): Tanü Congress Tir, Rahul Gandhi-i, Ato kilonser Narendra Modi-i jembiba oji tagitsü mali, ta linük nüburtemi metetogo, ta aitsü.
Ato kilonseri 2014 küm Lok Sabha election matongdang jembiba onüktem nung tangbo pai ola madoker, ta Rahul-i ashi.
November 28 nü Madhya Pradesh nung Assembly election agitsü lia tanü Vidisha district nung nüboyim sentong ka nung jembidang Gandhi-i, “Tamalen Modi-i jembiba onüktem nung ochimashi, aluyimertem aser mapa manguba tebilemtsü densema liasü. Ajisüaka tanübo pai item onüktem mejembir. Modi-i jembiba oji tagitsü mali ta tangbo linük nüburtemi rajemogo. Pai nangzükba ajak tu tiyazü,” ta ashi.
“2014 küm matongdangbo Narendra Modi-i loan agiba sentsüh atoktsü, aluyimertemi züsentetba aonsotsü atema bonus aser jenjang tajung latettsütsü ta jembia liasü; item tenangzükba kechiba mataloktsü? ta ni pa dang asüngdangner,” ta pai ashi.
Kodang Congress-i Madhya Pradesh nung sorkar kümdir lanurtem nem mapa agutsütsü atema Chief Minister-i anogoshia ghonda 18 mapa inyaktsü, ta pai ashi.
“Election agitsü aliba state ajak nung mapa manguba aser aluyimertem tebilemtsü lir. Parliament nung sorkari anogoshia lanur 450-i dang mapa angur, ta metetdaktsüogo. Ajisüaka China nungbo lanurtemi anogoshia mapa 50,000 angur,” ta paisa ashi.
Rahul Gandhi-i, state nung party-i sorkar kümra anogo 10 nü tsüngda aluyimertem dang sentsüh atoktsü aser Madhya Pradesh ya linük nung aluyimba tiyongtsü ka kümdaktsütsü, ta nangzük.