PM-i ‘Kam Ki Baat’ tenzüktsüla: Ibobi Singh

Imphal, March 01 (Agencies): Bodhbarnü Manipur Chief Minister, Okram Ibobi Singh-i Ato kilonser, Narendra Modi dang tenangzükbatemji mapa agi inyaka tenzüktsüla aser “Maan Ki Baat” ya “Kam ki baat” ta melentsüla, ta ashi.
Tanü Imphal nung Congress nüboyim lokti senden ka nung jembidang Chief Minister-i, tan election nunga BJP-i kasa tamakok angutsü, ta ashi.
Ibobi-i, kodangsa Centre nung BJP sorkar arudir state nung timtem adoker, Centre nung NDA sorkar küm ana yimsüsüba mapang timtem aika adokogo, aser iba mapang nung sorkar mapa inyakertem nem itasen magutsütet, ajisüaka Centre nung Congress sorkar aruba sülen ibaji tiptema liasü, ta ashi.
Paisa, “Tawa Union Minister temi 90 ben shi state semdangogo, ajisüaka parnoki BJP office tem dang semdang aser tenzüka aliba project kar atema dang lung azünga yutsü.
“Jiribam-Tupul-Imphal rail project ya taoba sorkar mapang tenzük, aser BJP-i lungki ajak atema lung azünga yutsüner. Lungki ajak agi 34 lir,” ta Ibobi-isa ashi.
Maneni paisa, “Imphal airport aser International airport yanglutsü atema state-i Airport Authority nem ali acre 500 agütsü aser airport leni aoba ali agitsü atema sen crore 200 intok, iba sülen teyari meshia Ato kilonser ajuru, ajisüaka sen kata magütsü,” ta metetdaktsü.
“Ato kilonser, Modi-i Imphal semdangdang pai, BJP sorkar tashii arura November 1 nungi highway mokdanga aliba anentsü ta nangzük, aser ibaji ajanga BJP-i NSCN(IM) den külemi mapa inyakba sayur,” ta Ibobi-i ashi.
“Ato kilonserisa, NSCN(IM) den tezüngzüktep magidang Congress lenirtem dena lemtepogo ta ashi. Ato kilonseri lenir shiba den jembiar iba tenüngji agüjang” ta paisa shisem.
Kasa senden nung state Congress Tir, T N Haokip-i, “Manipur shirangba tapu balala ajak atema Congress ji dang lenmang lir. Taoba election nung Congress-i menden 42 angu aser tang timba angutsü. Iba ya secular democracy aser communal forces na tsüngda lir,” ta ashi.
Deputy Chief Minister, Gaikhangam-ia, lokti ya nisung lakh 2-3 shi asütsü, aser iba ya ajanga Manipur nunger Congress party den lir ta sayur, ta metetdaktsü.
Congress nüboyim sentong ayongzüka aliba ajanga tanep nungi tenzüka Imphal yimti lenmang nung gari aser nisung mesemi liasü.