PM-i ketdangsertem dang Fani yipru atema renemshitsü tuyu

New Delhi, April 29 (Agencies): Cyclone Fani atema tebilemtsü kaa Ato kilonser, Narendra Modi-i ketdangsertem dang tenokdangba meratem agitsü aser teyari agütsütsü atema renema alitsü metetdaktsüogo.
Fani ta ajaba yipru ya south-east Bay of Bengal nung kanga sashia kümogo, aser maneni taruba ghonda 24 nung ano tesashiba akümtsü, ta yashi Weather Department-i sangdonga liasü.
Iba yipru ajanga taruba anogo ananü Tamil Nadu aser Andhra Pradesh tesem ajaklen tzünglu arutsü, ta parnokisa metetdakja liasü.
Tanü Ato kilonser Narendra Modi-i twitter ajanga, “Cyclone Fani dak sendakba nung ni ketdangsertem den jembiogo. Ni parnok dang tenokdangba mera balala agitsü aser akokba tashi teyari agütsütsü atema renema alitsü metetdaktsüogo. Ni parnok dang item state sorkartem den amalitepa inyaktsü metetdaktsüogo. Nisung ajak kümzüka alitsü asoshi ni sarasademtsür,” ta metetdaktsü.
Cyclone Fani ya tanü nikongdang tashi nung ano kanga tesashiba kümogo aser iba yipru ya tang southeast region Bay of Bengal nung lir.
Iba yipru ya tang northwest tsütsüleni ghonda nung kilometer 21 keraa ondar.
“Iba yipru ya Tamil Nadu aser Puducherry tzüyimkümlen anasa süiogo aser maneni tzüyimkümlen nungi piladar,” ta Indian Meteorological Department-i metetdaktsü.