PM-i Manmohan mezüngmeshir: Rahul ; BJP-i Rahul anema ken o asem benok

New Delhi, December 13 (Agencies): Tanü Gujarat Samachar TV Interview ka nung Congress lenir, Rahul Gandhi-i, Ato kilonseri tongtibang onüktem atema jembitsü melen, Manmohan Singh ang mezüngmeshir, ta ashi.
Ibaji ashishia BJP-i Rahul anema Election Commission nem ken o asem agütsüogo.
BJP-i ashiba agi, interview ji election nüboyim dak sendakba lir, aser ibaji election agitsü lia ghonda 48 tsüngda memelar.
Interview agidang Rahul-i BJP aija jembi, talisa Ato kilonser, Modi aija jembi.
“Ni ita asem tashi Gujarat dak sendakba onüktem indang jembia arur. Pai (Modi) Manmohan Singh mezüngmeshir. Tongtibang onüktem aser nüburtem tebilemtsü onüktem jembitsü melen, pa Manmohan Singh ang mezüngmeshir,” ta Rahul-i ashi.
Tawa Modi-i, taoba Ato kilonser, Manmohan densema Congress lenirtemi Pakistan den senteper Gujarat election nung BJP nem tamakok ngudaktsütsü atema inyaker, ta jembiba dak sendakba nung Rahul-i iba o ya jembiogo.
Rahul dang, BJP-i Rahul tsübur asü, ta asüngdangba langzüdang Rahul-i, “Pai (Modi) ni metsübur, saka pai Gujarat nüburtem tsübur,” ta ashi.
“Joko nüburtemi ni angatetdar. Sen aser BJP ajanga Rahul Gandhi tenüng menüktsür. Kü tenüng menüktsütsü atema nisung aika nem mapa lemzükja lir. Iba atemaji sen jenti indoker,” ta paisa ashi.
Rahul-i yashi Ato kilonseri Ahmedabad nung seaplane ka hire asüba atema aitsü.
Pai, “Gujarat atema BJP mangdang tajung mali. Ibayongji Ato kilonseri tongtibang onüktem mejembir, saka yangi (Gujarat) oli-aruli ta dang senzür. Aluyimertem onük atema mejemir, kecha mejembir,” ta ashi.