PM-i ochimashiba osang ni meteta lir: Rahul

New Delhi, December 14 (Agencies): Demonisation onük nung Ato kilonser, Narendra Modi maneni aija tanü Congress tatong Tir, Rahul Gandhi-i, Ato kilonseri ochimashiba osang meteta lir, ibayongji pa tsübur aser Parliament nung o jembitsü atema pa nem temelaba magütsür, ta ashi.
“Ato kilonseri ochimashiba indang osang ni meteta lir, koba ajanga pa tenüng menüktsü. Aser pai ibaji tsübur. Iba osangji Ato kilonseri pa nija ochimashiba lir,” ta Rahul Gandhi-i metetdaktsü.
Tanü Rahul-isa, November 8 nü sen note tamshidak anentsüba sülen linük nung sen agi anüngba tensa indang telangzübaji Ato kilonseri agütsütsüla, ta ashi.
Tawa British nunger kentener telok, Coldplay kenten sentong nung Ato kilonser adenba dak sentakba nung Rahul-i, “Iba ya democracy linük, anungji pai linük nüburtem nem telangzüba agütsütsüla. Pa kenten sentongtemi ang jena maotsüla,” ta ashi.
Rahul-isa, Ato kilonseri opposition ajurutsü tsübur, ibayongji BJP-i Lok Sabha nung o toktepba nokdanger, ta ashi.
“Ita ka tepiyong opposition ajaki Lok Sabha nung o toktepner, saka sorkar aser Ato kilonseri ibaji maginer. Lok Sabha nung o lemtepdak nungi Ato kilonseri jena maotsüla. Ato kilonseria pai kobika jembinüdir jembitsü akok,” ta Rahul-i ashi.
Tanü osangbenertem den jembidang Rahul den Mamata Banerjee’er party, Trinamool Congress züngsemtema liasü, aser parnokia sorkar telemtetba anema, iba telemtetba ajanga black money anendaktsür masü saka sensakertem, aluyimerten aser anogoshia aayangertem timtemdaktsür, ta ashi.
November 8 nü sen 500 aser 1,000 notes anentsüba sülen Ato kilonseri Parliament House ka nungdanga mejembi. Ajisüaka Ato kilonseribo Paliament nung jembitsü atema pa nem temelaba magütsür, ta jembir.