PM-i ola madokba ajanga melung malem adoker: D. Raja

New Delhi, July 07 (Agencies): Mongolbar nü Communist Party of India (CPI) lenir, D. Raja-i, Vyapam ochimashi ken nung Ato kilonser Narendra Modi-i ola madokba ajanga melung malem aika adoker, ta ashi.
“Iba ken o nung Ato kilonseri ola madokba ajanga melung malem aika adoker. Ola madokba ajanga iba ken o pai mezüngmeshiba sayur. Iba ken o ya Supreme Court-i ketdangsüa CBI-i bushisüngdangtsüla,” ta Raja-i ashi.
Tanü Madhya Pradesh chief minister Shivraj Singh Chouhan-ia, Vyapam ochimashi ken o ya CBI nem bushisüngdangdaktsütsü asoshi tetuyuba agüjang ta pai High Court dang mepishitsü, ta shiogo.
MP CM Chouhan-isa, Congress-i tamentaktak makai pa anema tai tongloktsür aser parnoki aitsüba nükjidongji pa tenüng menüktsütsü asoshi dang lir, ta ashi.
Yashi pai, iba ken o ya Madhya Pradesh High Court-i ketdangsüa Special Investigation Team (SIT) ka nem bushisüngdangdaktsüdagi, iba dak alia CBI nem bushidaktsütsü asoshibo court-i ang lemtettsü, ta shia liasü.
“Ozü sorkar ya judiciary dang nungi temaba masü. CBI nem bushidaktsütsü asoshi High Court-i memelunger nung kodaser onoki tetuyuba agütsütettsü (?)” ta pai ashi.