PM-i pa melungka agi external affairs ministry tashi amshir: Khurshid

Farrukhhabad, July 21 (Agencies): Tanü Congress senior lenir Salman Khurshid-i, Ato kilonser Narendra Modi-i pa melungba nung external affairs ministry tashi amshir, ta sashia aitsüogo.

“External affairs ministry-i parnok sasa sadoka tashi mamshiteter, kechiyong Ato kilonseri pa melungba nung tashi amshitsü meranger,” ta taoba mapang external affairs minister Khurshid-i ashi.

“Foreign policy ajanga langka tajung kata bener marütsütetba kuli tongtibang rongnung iba ya ka lir,” ta Khurshid-i ashi.

Lalit Modi ken o nung External affairs minister Sushma Swaraj menden nungi alutsüdaktsütsü Congress Party-i anir opposition party temi akhangba dak sentakba nung pai, ” Onük aika nung la aitsüba liaka, iba tetetzü lai tashi aser teinyaktsü tashi magientsütettsü,” ta ashi.

Modi’er foreign policy ya khenyongi tamakok ka lir ta shia pai, iba ya pai (Modi) tashi ajak amshinüba aser tenüng aginüba ajanga lir, ta ashi.

“Opposition-i pusemba medenibo aser tesadang kati dang merangba agibo alima nung linük katia foreign policy nung takok mangutsü,” ta Khurshid-i ashi.

Taoba mapang nung Ato kilonser Atal Bihari Vajpayee-ibo iba onük nung opposition tangatetba-a agia liasü, ta paisa ashi.

Pakistan linük den ken o dak sentakba nung pai, India tebilemtsü bentettsü asoshi iba (Pakistan) linüki kodanga ochishia maru, ta ashi.

Ano Bihar assembly election dak sentakba nung Khurshid-i party-i takok angutsü, ta melunglema jembiogo.