PM-i Parliament nung madenba onük benoktsü: Congress

New Delhi, August 13 (Agencies): Ato kilonser, Narendra Modi Parliament nung madenba atema jashir ta Congress-i, asükwa mongpu Parliament nung party-i Ato kilonseri Parliament nung madenbaji tongtibang onük ka kümdaktsütsü, ta metetdaktsü.
Tanü Congress otongdar, Kapil Sibal-i, “Tzüngluruwa Parliament senden tembangogo. Onoki tongtibang onük aika jembiogo.  Ajisüaka item o lemtep senden aika nung Ato kilonser maliasü,” ta ashi.
Lok Sabha aser Rajya Sabha naprong nung Kashmir onük aser Dalit nunger anema inyakba onüktem nung o lemtep aser item o lemtep nung Ato kilonser maliasü, ta pai ashi.
Paisa, tamalena Parliament nung Arunachal Pradesh aser Uttarakhand na nung Angh teinyaktsü shilem indang o lemtepdang Ato kilonser maliasü, ta ashi.
“Parliament nung madenba asen Ato kilonser ka lir. Iba ya tejashitsüka. Pai linük Temzüng akhümtsübur ta ashir, saka Parliament nungbo madener,” ta Sibal-i ashi.
“Taruba senden nung onoki iba onük süoka jembitsü. Kechiba Ato kilonseri Parliament-i marur? Iba ya pai tsübuba ajanga lir. Onoki paji linük tanüker ka kümdaktsüner aser linük nem telangzüba agütsüdaktsüner,” ta Congress lenirisa ashi.
“Tasüngdangbatem telangzüba agütsütsüji Ato kilonser yimya nung maket, Ato kilonser Gujarat chief minister alidanga pai kasaji inyaka liasü,” ta paisa aitsü.
“Ato kilonseri nüboyim sentong aser lokti senden nung ang jembiner, kechiyong lokti nungbo lokti telangzüba agütsütsü madoker. Ajisüaka Parliament nungbo nai opposition nem telangzüba agütsütsüsa akümer,” ta pai ashi.