New Delhi, October 27 (Agencies): Ato kilonser Narendra Modi-i temeim mapa atema inyaker Pakistan nunger nüngtugu Abdul Sattar Edhi nem pa indang charity Edhi Foundation atema sen crore ka agütsü, ajisüaka pai iba senji agizüktsü memulung.
Edhi Foundation otongdar Anwar Kazmi-i, “Abdul Sattar Edhi-i Ato kilonser Modi dang pelaba lemsatepogo aser pai senotsü teyari agütsübaji magizük,” ta ashiba ‘Dawn’ osang ajanga metetdaktsü.
Kazmi-isa, iba dak sentakba nung Edhi’er jabaso, Faisal Edhi-i nikongdang 4:30 ako meta Karachi Press Club nung osangbenertem senden nung jembitsü, ta ashi.
India tsür tenarong tajak aser temeli tatsük Geeta India tonga aruba sülen Hombarnü Ato kilonser Modi-i, iba charity nem sen crore ka tenla agütsütsü, ta sangdonga liasü.
Geeta anepalua reprangba atema Hombarnü Modi-i Edhi Foundation nem teyari agütsütsü sangdonga liasü.
“Geeta anepalua reprangba atema Edhi’er kibong dang pelar ta ashitsüji o agi mabensatsü. Parnok ya temeim aser aria bilemba nisungtem lir,” ta Hombar nü Modi-i twitter ajanga ashi.
“Edhi’er kibongi inyakbaji asadangtsü makok, ajisüaka par foundation atema sen million 10 tenlaba ni pelaseta sangdonger,” ta Modi-isa twitter ajanga ashi.
Edhi Foundation ya tajangzük bushiba NGO ka masü. Iba foundation ya Abdul Sattar Edhi-i 1951 küm tenteta liasü. Pa dang ya Pakistan nunger “Father Teresa” ta ajar.
You must be logged in to post a comment Login