PM-i sensakertem atema masü takartem atema inyaker: Rahul

Kushinagar, March 01 (Agencies): Tanü Congress tatong Tir, Rahul Gandhi-i, Ato kilonser, Narendra Modi-i sensaker aluyimertem atema masü saka capitalists atema dang inyaktsür, ta aitsü.
Tanü Kushinagar (Uttar Pradesh) nung election nüboyim sentong ka nung jembidang Gandhi-i, “Aonsotsü züngsentetertemi parnoki züngsentetba nungi tajangzük mangur. Modi-i aluyimertem meyari. Pai tenzüngzükbatem raksa. Tesüiba küm ana ser tesadang nung pai aluyimer 50 dang ang sentsüh atok. Pai linük nung takartem atema dang inyaktsür saka lanurtem aser aluyimertem atemabo meinyaktsür,” ta ashi.
“Narendra Modi-i, Gujarat nungi ‘Ganga Maa’-i pa aja ta jembir. Ni pa dang ya asüngdangner, ‘Ganga Maa’ ji jabaso ka dang ali asü?” ta Rahul-i asüngdang.
Modi-i aluyimertemi ayimtenba mangashir, ta shia Rahul-i, “Kodang aluyimer kati mesen asütsü mozü pongdang ka ngudir, pai ibaji jema peisasa asütsü atema temelung dangi arur. Aluyimertem ola nembangtsür,” ta ashi.
Modi-i yazü nangzüker ta shia Rahul-i, “Ato kilonser Modi-i UP assembly elections nung party-i takok ngura pai aluyimertem sentsüh atoktsü ta nangzükogo. Iba ya yazü lir. Yazü tenangzükbatem nung ajemdaker pai tesendaktep yanglutsü meranger,” ta ashi.
Tan Honibarnü UP election shilem trokbuba nung constituency 49 nung election agitsü.
Item constituency temji Maharajganj, Kushinagar, Gorakhpur, Deoria, Azamgarh, Mau aser Ballia district tem nung lir.