PM-i sensakertem sentsü matoker: Rahul

September 06, 2016 nü Uttar Pradesh, Kushinagar district nung Congress tatong Tir, Rahul Gandhi-i Party pusemertem den jembiba noksa nung angur.

Gorakhpur, September 07 (Agencies): Tanü Congress tatong Tir, Rahul Gandhi-i Uttar Pradesh, Gorakhpur district nung kilometer 2500 ‘Kisan Yatra’ nung shilem agidang, ”Centre sorkari linük nung aluyimertem amatokogo,” ta ashi.
Ato kilonser, Narendra Modi aija Gandhi-i, “Modi-i takar aluyimertemi sen apua aliba tokogo, ajisüaka sensaker aluyimertemi apua alibabo matoker,” ta ashi.
Aluyimertem timtem olaji Congress-i sorkar nem angashidaktsütsü ta shia Rahul-i, “Onoki aluyimertem dang sentsüh crore 70,000 atokba ama NDA sorkar danga kasaji inyakang ta onoki akhangtsü,” ta ashi.
Tanep yakta Rahul-i Baba Raghav Das Medical College, Gorakhpur nung Encephalitis agi shiranger kata ajurua liasü.
Yashia Deoria nung jembidang Rahul-i, Narendra Modi’er sorkari aluyimertem timtem atema mebilemtsür, ta aitsü.
Assembly election agitsü aliba state, UP nung yashi Rahul-i kilometer 2,500 ‘Kisan Yatra’ tenzüka liasü. Iba sentong kübok pai UP constituency 80 nungi constituency 55 sema senzütsü.