PM-i state 4 nung sen cr. 50,000 indang project tenzüktsütsü

New Delhi, July 05 (Agencies): Hokolbar aser Honibarnü Ato kilonser, Narendra Modi-i Uttar Pradesh, Chhattisgarh, Telangana aser Rajasthan state tem semdangba mapang nung sen crore 50,000 indang project 50 tenzüktsütsü.

Sangküm Lok Sabha election agitsü lia Centre nung BJP-i aniba sorkari taruba ita 8-9 tsüngda terenlok project tasen aika tenzüktsütsü, talisa taruba ita ishika tsüngda assembly elections agitsü aliba state tem nung project aika tembanga semzüktsütsü sentong lir.

Hombarnü Modi leniba nung amenba senden nung sangküm February-March nung sen 7.6 lakh crore jenjang project 560 semzüktsü aser state balala nung sen 5.6 lakh crore jenjang project 350 atema lung azüngtsütsü, ta metetdakja liasü.

Iba project rongnung signature projects 60-65 shi lir aser item ama tongtibang project shia nungji sen crore 5,000 shi indoktsü. Item projects rongnung Chenab apu, Pamban Railway apu, Sone apu, Dwarka Expressway, Delhi-Mumbai Expressway kübok Ankleshwar-Baroda lenmang aser Gorakhpur-Haryana Anu Vidyut Pariyojna lir.

Ato kilonseri item signature project ana- Amritsar-Jamnagar Expressway aser Pandit Deen Dayal Upadhyay Junction nungi Son Nagar tashi freight corridor semzüktsütsü.

Osang angazükba agi, project 200 bo renemer semzüktsüba dang lir aser ano project 200 taküm küm tatembanglen tashi nungbo renemtsü.

Hokolbarnü Modi mezüng Raipur-i aoba sülen project kar atema lung azüngtsütsü aser project kar semzüktsütsü, iba sülen lokti senden ka nung adentsü.

Iba sülen pai Gorakhpur semdanga Gita Press nung sentong ka nung adenba sülen Vande Bharat train asem tenzüktsütsü. Paisa Gorakhpur railway station yanglushitsü atema lung azüngtsütsü.

Ato kilonseri Uttar Pradesh kübok Varanasi semdanga yangji project kar atema lung azüngtsüba den project kar semzüktsütsü, item rongnung Varanasi-Jaunpur section four lane densema lir.

Honibarnü pai Telangana kübok Warangal semdangtsü aser project balala atema lung azüngtsüba sülen Rajasthan kübok Bikaner semdangtsü.