PM-i Tata Nano Project atema sen cr. 35,000 agütsü: Rahul

Ahmedabad (Gujarat), November 11 (Agencies): Ato kilonser, Narendra Modi aser Centre sorkar maneni aija Congress tatong Tir, Rahul Gandhi-i, Congress-i yimtsüngtem nung Rural Employment Guarantee scheme MGNREGA atema sen agütsü, ajisüaka Ato kilonser, Modi-ibo Tata Nano project atema dang sen agütsü, ta ashi.
Gujarat assembly election atema Sabarkantha nung nüboyimba sentong ka nung jembidang Rahul-i, “Onoki MGNREGA project atema sen crore 35,000 agütsü, saka Modi-ibo Tata Nano project atema sen crore 35,000 agütsü,” ta ashi.
Rahul-isa Modi sorkari benokba Goods and Services Tax (GST) ajanga industrialists dang ajangzüktsü, ta ashi.
“GST nükjidong ya India tongtiret sükdangtsütsü aser industrialist kar tashi itdaktsütsü atema lir,” ta pai ashi.
Modi sorkari nüburtem taginüba memetet, ta shia Congress leniri, “Aonung 8:00 ako nung ghonda pezü tsüngda sen notes tamshidak anentsütsü ta sangdongba sorkari nüburtem melungjangbo memetet,” ta ashi.
Honibar nungi tenzüka Rahul-i anogo asemnü north Gujarat nung party atema nübo yimtsütsü. Iba mapang nung pai district trok semdangtsü. Paisa tetsürtem, yimdaklirtem aser tamangba lokti balala ajurua senden amentsü.
Tanep Rahul-i Banaskantha district nung Ambaji tekülem ki semdanga sarasadema liasü.
Tawa pai Saurashtra, central Gujarat aser south Gujarat tema semdanga liasü.