PM-i telemsa adokdaktsütsüsa oren jembir: CM Nitish Kumar

New Delhi, October 30 (Agencies): Ato kilonser Narendra Modi maneni aija tanü Hokolbar nü Bihar Chief Minister, Nitish Kumar-i, Ato Kilonseri telemsa adoktsüsa o jembiba ajanga pai assembly election nung takok kanga ngunüba temaitsü sayur, ta ashi.

Ato kilonser Modi-i Gopalganj aser Muzaffarpur na nung election nüboyim sentong nung jembiba sülen ghonda ishika tsüngda Nitish-i twitter ajanga, “Modi-i telemsa adoktsüsa o jembiba ajanga süngmanger. Bihar nung tamakok anguba tongbang ka nung pai takok angutsü kanga merangdang pai India nunga tamakok angutsü südi,” ta ashi.

Gopalganj nung lokti senden nung jembidang Modi-i, RJD, JD(U) aser Congress teloktepi tang aliba reservation inyakyim nung temelenshi akatsü sentong lir aser nüburtem nem iba tajangzükji tamangba lokti apir agütsütsü meranger, ta jembia liasü.

Nüboyim sentong nungsa Modi-i, “Anogo ishika tejakdang ni reservation nung parnok (opposition) sentong metetdaktsüba mapang nüburtem kanga jashia liasü. Item lenirtemi reservation shilem pongubo Dalits, Mahadalits, OBCs aser EBCs nungi agitetner. Parnoki ibaji tanga tamangba lokti (Muslim) nem agütsüner,” ta ashi.

Tamalen Nitish Kumar-i Bihar nunger vs bendanger ta jembiba dak sentakba nung Muzaffarpur nung jembidang Modi-i, “Sonia Gandhi Delhi nung alir. Nai pa dang bendanger asü Bihari ta ajar. Ni India Ato kilonser masü no (?) Bihar ya India nung lir masü no (?) Süra ni bendanger asütsü ama (?),” ta ashi.

Bihar Assembly election shilem pezübuba November 1 nü agitsü. Iba anogo nung menden 55 atema state nüburtemi vote agütsütsü.