PM mapatongtem ajanga kiralongrar nem maongka agütsü: Rahul

New Delhi, July 12 (Agencies): Bodhbarnü Congress tatong Tir, Rahul Gandhi-i, Ato kilonser, Narendra Modi-i mapang tatsüka tsüngda nungsa yimtenren nung tajangzük angutsü atema inyakba ajanga Kashmir nung kiralongrartem nem maongka agütsü, koba ajanga Hombarnü Amarnath temeshi aieni aoertem amakba ama tatalokba aika bulur, ta aitsü.
Ato kilonser, Modi’er party BJP-i Kashmir nung sorkar akumtsü atema PDP den loktepba dak sendakba nung Rahul-i, BJP-PDP teloktep ajanga India-i takoksa kanga ajurudar, ta ashi.
Ato kilonseri tajangzük angutsü atema inyakba ajanga India-i takoksa ajurur, iba den külemi India nunger tai maket nüburtem azü lalur, ta ashi.
Ano Sikkim nung aliba India-China arrtsü tensa dak sendakba nung Rahul-i Twitter ajanga sorkar aija liasü.
Hombarnü kiralongrartemi amakba sülen Rahul-i, temeshi aieni aoertem amakba atema Ato kilonseri pasasatai agitsüla, ta ashi.
Taoba hopta nunga Rahul-i, Sikkim nung China-i ali atsünga agiba atema kechiba Ato kilonser, Modi-ii ola madoker, ta aija liasü.
Tawatanü ka nungi Rahul-i Ato kilonser kanga aija arudar, aser taoba hopta nunga pai, US-i Kashmir ji India-i ketdangsüba Kashmir ta jembiba agizükba atema pai Ato kilonser tashimait, ta aija liasü.
Rahul-i, “India nung tashimait Ato kilonser lir,” ta ashi.
June 26, 2017 nü sangdong ka nung US-i, Hizbul Mujahideen (HM) tongti, Syed Salahuddin ji alima kiralongrar, ta sangdongba mapang nung US-i India’er state Kashmir ya “India-i ketdangsüba Jammu & Kashmir”, ta ashi.