PM Modi, Amit nem Bihar tamakok tongloktsübaji tim masü: Nitin

New Delhi, November 11 (Agencies): Bodhbar nü Union Minister, Nitin Gadkari-i, Bihar election nung tamakok anguba atema Ato kilonser Narendra Modi aser BJP Tir, Amit Shah na nem tai tongloktsübaji tim masü, ta ashi.

Osangbenertem den jembidang Gadkari-i, “BJP ya kibong ka masü saka party ka nung inyakertem lir. Takokji ajak atema, aser tamakokji-a ajak atema,” ta ashi.

Bihar election nung tamakok anguba dak sentakba nung Ato kilonser Modi aser BJP Tir Amit Shah na anema jembirtem nem temerenshi tulu agütsütsüla, ta paisa ashi.

BJP lenir taintem- LK Advani, MM Joshi, Yashwant Sinha aser Shanta Kumar nungeri, Bihar election nung BJP tamakok atema tenüng agitsüla ta akhangba sülen anogo ka lir tanü Gadkari-i item o jembiogo.

Pai ashiba agi, kodang party-i tamakok ngudir ajaki ibaji reprangshitsü atema jembir, ajisüaka kodang party-i takok ngudir ibaji reprangshitsü atemabo shingaia mejembir.

BJP lenir taintem- LK Advani, MM Joshi, Yashwant Sinha aser Shanta Kumar nungeri, Bihar tamakok atema kuli reprangshitsüla ta akhangba sangdong ka agüja liasü. Iba takhangba ya Modi aser Shah na anema akhangba ka mesüka lir.

Iba dak sentakba nung Gadkari-i, “Iba onük atema onoki Advani den jembitsü,” ta shiogo.

“Bihar osang ajanga, Delhi nung tamakok nungi tangazükba kecha magi ta sayur. Bihar nung tamakok kuli tongtibangbaji, yaküm party tashi miti akumba lir. Iba reprangshiba nungjagi party-i karbo metettsü tim aser ajak tangatettep aliba jenjang raksaba indanga metettsüla,” ta party lenir taintemi ashi.

“Iba reprangshiba nungji ketdangsertem aser Bihar nung nüboyim akartemi madentsüla. Iba tamakokji ajak kuli lir ta jembibaji nisung shinga tai mali ta jembiba lir,” ta parnokisa ashi.

Iba dak sentakba nungsa taoba mapang BJP Tir tem Rajnath Singh, Venkaiah Naidu aser Gadkari nungeri, “Party züngsem tain kari jembiba sangdongji onoki züngogo. Atangji züngsem ajaki Bihar assembly election osang atema tebilemtsü akar,” ta ashi.

2014 General Elections sülen BJP bangdakpurtemi party nung lenir taintem parliamentary board nungi agien, aser committee tasen, Marg Darshak Mandal nung dendaktsü.