PM Modi anendaktsütsü atema Trinamool Cong-i longkak aiter

Kolkata/New Delhi, January 09 (Agencies): Centre sorkari sen tamshidak anentsütsü atema telemtetba agiba anema Hombarnü West Bengal Chief Minister, Mamata Banerjee-i aniba Trinamool Congress-i, Ato kilonser, Narendra Modi menden nungi anendaktsür linük kümzükang ta takhangba agüja linük tesem ajaklen anogo asemnü longkak aitba sentong tenzükogo.
November 8 nü Modi-i sen 1,000 aser 500 notes anentsüba ji tamakok ka liasü, ta shia Trinamool tongti aser WB Chief Minister, Banerjee-i, lar party-i Odisha, Punjab, Bihar, Manipur, Tripura aser Assam den Jharkhand, West Bengal aser linük yimtiba, Delhi nung longkak aittsü, ta metetdaktsü.
Tanü Kolkata nung osangbenertem den jembidang Mamata-i, “Modi-i taaktsü maket telemtetba agiba anema Trinamool Congress-i linük tesem ajaken longkak aitba sentong ayongzüker,” ta ashi.
Demonetisation telemtetba agientsü atema lai takhangba agüja arur aser laisa bank aser ATMs nungi sen telatet ka dang agizükdaktsüba yaa agientsü akhanger.
“Modi agienang, aser linük kümzükang” ta ozülu amer Trinamool MP 35-i linük yimtiba nung yimyim ayima Centre nung “National Government” ka tentettsüla, ta takhangba agutsü.
Trinamool MP, Sultan Ahmed-i, “Telemtetba tesashi agir ita ana sülena linük tesem ajaklen nüburtem jenti maneni timtemdar, aser nisung 100 dak tema süogo,” ta ashi.
Paisa, “Linük kümzüktsü atema Modi agientsüla. Centre nung National sorkar ka tentettsüla,” ta ashi.
January 6 nüa Mamata Banerjee-i Tir, Pranab Mukherjee dang Modi agiener linük kümzüktsüla aser BJP lenir tain, L.K. Advani mesüra Union Finance Minister, Arun Jaitley mesüra Union Home Minister, Rajnath Singh-i aniba National sorkar ka tentettsüla, ta shia liasü.