PM Modi aser Congress tir Sonia-i asükhu lemsatep

Imphal, August 23 (Agencies): Ato kilonser Narendra Modi-i tanü taoba Manipur chief minister asür Rishang Keishing den asükhu lemsatepogo, pai ashiba agi, pa asüba ajanga northeast tesem nung yimden yimsüsüba ren nung tapok ka adokdaktsüogo.
Keishing ya Congress lenir tejen ka liasü aser pa yashi arishi küm 98 buba nung süogo. Pa poknung nung timtem adoka Regional Institute of Medical Sciences (RIMS) Imphal nung asü.
“Rishang Keishing asüba ajanga Northeast tesem nung yimden yimsüsüba tsütsü tapok ka adokdaktsüogo koba pai bendanga agüja tenzükogo,” ta Modi-i tweet asü.
“Iba amala tejashitsü mapang ka nung Rishang Keishing’er kibong aser pa den anidakertem ni bilemteter aser parnok den asükhu lemsateper,” ta Ato Kilonser-i shisem.
Kasa mapang nung Congress tir Sonia Gandhi-ia asükhu lemsatepogo.
Congress tir-i ashiba agi, “Linük nung lenir rongnung tejentiba ka asüba angashia kanga mepelar. Pai nübur küm 70 shi tenzükogo aser India mezüngbuba Parliament nung züngsem ka liasü.”
Sonia-i asür Keishing’er kinunger aser medemertem, aser Manipur nunger temden asükhu lemsatepa aser pai bendanga agüja inyakba mapa tajung tarutsü atema tangazükba tajung ka asütsü imlaba lemsatep.
Keishing ya Naga nunger lir aser pa Manipur nung chief minister ama 1980 nung 1988 tashi aser 1994 nungi 1997 tashi inyaka liasü.
Keishing ya Manipur, Ukhrul district kübok Bungpa yimtsüng nungi lir aser pa 1952 küm Mezüngbuba Lok Sabha atema Parliamentary election nung shima liasü.
Keishing-i Manipur chief minister ama pezüben inyakogo aser pa 2014 tashi Rajya Sabha züngsem ka liasü.
Keishing ya July 1 nü mozüki-i temang anepalutsü atema anir ao aser pa yashi August 22 nü süogo. Pai jala pezü aser jabaso ana ta doktsür süogo.
Osang ajanga ashiba agi, Rishang Keishing Hokolbarnü par yimtsüng Bungpa nung aremtsü.