PM Modi aser Russia Tir Putin nati linük ana tesendaktep onüktem jembi

Xiamen/New Delhi, September 04 (Agencies): Hombarnü China kübok Xiamen yimti nung India Ato kilonser, Narendra Modi-i Russia Tir, Vladimir Putin ajurua shishilembaba aser investment nung linük ana tesendaktep tashi itshitsü atema jembiba den külemi Afghanistan nung security tensa indang jembiogo, ta tanü nikongdang osang ka ajanga metetdaktsü.
China kübok, Xiamen nung BRICS Summit senden aliba mapang nung lenir ana ya jurila senden ka amenba liasü.
Yasüng Narendra Modi China tonga aoba sülen tang mezüng pai linük ana tsüngda senden amen.
Ato kilonser, Modi-isa China Tir, Xi Jinping ajurua senden amentsü sentong lir, iba sülen asüng pa Myanmar linüki aotsü sentong lir.
“Linük ana leniri linük ana tesendaktep densema onük aika süoka jembi. Iba senden nung Tir Putin-ia taküm küm tetenzüklen Ato kilonseri Russia semdangba indang lepshia jembi. Paisa Ato kilonseri India tenüng nung Eastern Economic Forum nung shilem agiba atema pelaba lemsatep,” ta External affairs ministry nung otongdar, Raveesh Kumar-i Xiamen nung osangbenertem dang metetdaktsü.
Linük ana leniri Afghanistan onüka süoka jembir asü? ta asüngdangba langzüdang Kumar-i, Afghanistan indang tensa densema regional onüktema kar jembiogo, ta ashi, ajisüaka pai osang tejangjabo memetetdaksü.
Modi-Putin senden nungsa oil & natural gas sector nunga linük anati amalitepa inyaktsü atema jembiogo, ta otongdarisa metetdaktsü.
“Tir Putin-isa taküm küm tetenzüklen Russia nung ‘Festival of India’ ayongzüka amongba indang süoka jembi. Linük ana tsüngda tourism ajungkettsütsü aser kaketshirtem tsüngda exchange program alitsü atema-a jembiogo,” ta Kumar-i shisem.
Tesülen Modi-i Brazil Tir, Michel Temer-a ajurua alima atema külem mangdang ka yur amalitepa inyaktsü atema bangjem.