New Delhi, August 10 (Agencies): Taküm September 4-5 nü G20 senden aliba mapang Ato kilonser, Narendra Modi aser US Tir, Barack Obama na Hangzhou, China nung jurila senden ka amentsü sentong lir, aser ibaji tang US Tir teinyakdak mapang tena senden tatembangbuba amener asütsü, kechiyong sangküm küm tetenzüklen Obama-i Tir menden toktsütsü.
Taküm August 30-31 nü Delhi nung Indo-US strategic & commercial dialogue senden amentsü, aser iba mapang nung linük ana tsüngda cyber tesentaktep atema tezüngzüktep ka agitsü.
Takümbo Ato kilonser Modi United Nations general assembly nung madentsü, saka September 7-8 nü East Asia & India-Asean senden nung adentsü atema Laos-i aotsü.
China nung senden alidang linük anati jurila senden ka ayongtsü sentong lir.
Obama aser Modi nati 2014 küm nungi linük tesentaktep tajungba yanglutsü meranger.
Modi Ato kilonser akumba sülen pai US pezüben semdangogo aser 2015 küm India nunger Republic Day benjungmung nunga US Tir jaoka liasü, iba dak alia senden balala alidang tena jurila senden-a aiben menogo.
Tesüiba küm ana nung lenir ana tesentaktep kanga junga kümogo. US-i India ji tongtibang defence partner ka ta sangdongba den külemi US-i Pakistan dang F-16 fighter jets mayokba densema Pakistan anema mera aika agiogo.
You must be logged in to post a comment Login