PM Modi Bangladesh nungi India tongogo

Dhaka/New Delhi, June 07 (Agencies) : Ato kilonser Narendra Modi-i anogo ana Bangladesh yimtiba, Dhaka semdangba sülen tanü India tonga aruogo.
Tanü Ato kilonser Modi-I Bangabandhu International Conference Center nung sobaliba sentong ka jembiba sülen Dhaka yimti nungi India linüki apusoa liasü.
Pai anogo ananü Bangladesh semdangbamapang yimtenren lir aika ajuruogo.
Modi-iDhaka yimti nung aliba Dhakeshwari Temple-i oa sarasadem aser Ramakrishna Mission-a semdanga liasü. Iba dak alia pai Indian High Commission semdangbamapang India-i senotsü agüja tenzüktsü aliba project trok lapoktsüogo.
Iba sülen pai taoba India Ato kilonser Atal Bihari Vajpayee nüngtem nung Bangladesh indang tetushi sempet, Liberation War Honour Bangladesh Tir, AbdulHamid ket nungi agizükja liasü. Iba sempet ya Bangladesh linük nüjiso bushiba nung shilem junga agiba asoshi Vajpayee nem agütsür.
Arishi küm 90 Vajpayee temang nung mekokmein aliba den külemi ainlen senzütsü asakba ajanga pai iba sempet agizüktsü asoshi oteti liasü.
Yashi Modi aser Bangladesh Ato kilonser Sheikh Hasina na tsüngda Land Boundary Agreement (LBA) tezüngzüktep agia liasü. Iba tezüngzüktep agiba ajanga küm 41 tashi arrtsü nung mangatettep ken o aliba tembangogo.
Modi New Delhi-i apusotsü lia twitter ajanga pai, “Kanga pelar Bangladesh. Iba semdangba ya kü mulungjang nung teti alitsü. (Linük) Semdangba ajanga tesentaktep tajungleni anitsü,” ta lemsatepa liasü.
Ano New Delhi nungi osang ka ajanga,Ato kilonser Narendra Modi-i Bangladesh ananü semdangba mapang linük anogo ana tsüngda tezüngzüktep 22 agiba den Land Boundary Agreement (LBA) tezüngzüktep agir linük tonga aruogo, ta metetdaktsü.