PM Modi BJP otongdartem dang mepelar

New Delhi, Feb. 03 (Agencies): Ato kilonser Narendra Modi-i BJP otongdar ajak aser television panelists ajak dang NDA sorkari Jan Dhan Yojana, crop insurance aser pension schemes ama rongsenkettsüng nung inyaktetbatem junga sangdongtsüla, ta tuyuogo.

BJP anemer party temi linük nung akhümtsübutep maliba aser lokti tsüngda raraba onüktem jembiba ajanga BJP ji minority aser Dalit nunger anemertem ama sayur, aser item sang nungji party otongdartem metsüktsüla, ta Modi-i shiogo.

Osang ajanga angazükba agi, Modi aser BJP Tir, Amit Shah na party otongdartem dang mepelar, kechiyong tesüiba ita 19 nung NDA sorkari inyaktetba mapatem parnoki junga mesangdonger.

“News channel balala nung o toktepba mapang BJP otongdartem aser panelist temji Congress aser tanga opposition party temi aitsüba dang masü saka shilem agir mongintem o chir ang tembanger. Modi’er sorkari inyaktetbatem junga sayatsü melena, sorkarji Muslim aser Dalit anemertem masü ta o dang tokteper,” ta BJP lenir kati ashi.