PM Modi dang Varanasi toktsür aotsü akhanger

Lucknow, Mongputeni (October) 9 (Agencies): Anogo ishika Uttar Pradesh aser Bihar nunger aayanger aika Gujarat toktsür jena aoba mapang UP-Bihar Ekta Manch züngsemtemi Prime Minister Narendra Modi dang Varanasi toktsür aotsü atema poster tem sayur.
Modi-ji Gujarati nunger ka lir anungji pai Varanasi toktsür aotsüla ta poster tem nung zülua lir. PM’er Parliamentary constituency Varanasi kübok Sigra tesem nunga poster tem yuja lir.
“Onoki linük nung sensotem ajak kasa meimer. Maharashtra mesüra Gujarat nungia süang kasa dang meimer, saka Maharashtra aser Gujarat nung North Indians anema mapa inyakba onoki aitsür. Onoki Varanasi nungi Gujarati MP ka shim aser onoki shinga anema mejembi. North India nunger dak taochi maliba mapa inyakertem merenshiang ta onoki akhanger” ta kaketshir lennir Vishwanath Kunwar-i ashi.
“Onoki Maharashtra aser Gujarat nunger dang hopta ka tsüngda Varanasi toktsür oang ta tetuyuba ka agütsüogo. Parnoki iba tetuyuba sülen manidakra timtem ajurutsü” ta paisa ashi.
Hombarnü Uttar Pradesh chief minister Yogi Adityanath-i Gujarat CM Vijay Rupani den jembi aser aayangertem dak tashiyim mapa inyakba khuret lemsatep.
“Tesüiba anogo asemnü tsüngda ozüng alema mapa inyakba kecha matalok aser nisungtemi olulutem prokshir, kechiyong parnoki Gujarat renlokba atema nükmeremer ta Rupani-i kü dang shiogo” ta Yogi-i metetdaktsü.
Ajisüaka, Congress otongdar Anshu Awasthi-i “CM Yogi-i tang Gujarat nungi election nung tokteptsü bilemer asütsü akok, kechiyong pa tasodak Gorakhpur nung alirtemi pa sendokogo” ta aitsü.
UP CM-i par state nung alirtem asü Gujarat nung alirtem atema bilemtsür, ta Awasthi-isa asüngdang.
Taoba UP chief minister aser Samajwadi Party tanishir Akhilesh Yadav-ia iba ken o atema BJP dak tai tongloktsür.
“Maneni Gujarat nung atalokogo. Nisung kar tetuyuba ajanga nisungtemi ozüng alema mapa inyaker aser Hindi tesemtem nung alirtem sempatsü osang prokshir. Iba tebilemtsü ya Centre aser state BJP sorkartemi abentsü” ta Akhilesh-i metetdaktsü.