PM Modi den minister 57-i Yoga sentongtem nung shilem agitsü

New Delhi, June 19 (Agencies): Mongolbarnü, June 21 nü 2buba International Yoga Day anogomung nung Union minister 57-i linük tesem balala nung Yoga sentong balala nung shilem agitsü aser Ato kilonser, Narendra Modi-ia Chandigarh nung Yoga sentong nung shilem agitsü.
Linük tesem ajungalen sorkari ayongzükba Yoga sentong balala nung minister temi anir shilem agitsü aser parnok rongnung minister 10-i assembly election agitsü aliba state, Uttar Pradesh nung shilem agitsü.
2014 küm December ita nung United Nations General Assembly-i June 21 ya International Day of Yoga ta sangdonga liasü. Islam linük 40 densema linük 190 dak tema-ia yoga day ya agizükba sülen yaküm June 21 nü mezüngbuba International Yoga Day munga liasü. Iba mapang nung Modi-i Delhi nung aliba Rajpath nung nisung 36,000 den külemi Yoga shilem agia liasü.
Taküm küm iba anogomung sentong lenitsü atema lemzükja aliba minister tem rongnung Home Minister Rajnath Singh, Finance Minister Arun Jaitley, Defence Minister Manohar Parrikar aser HRD Minister Smriti Irani nunger densema lir.
Uttar Pradesh nunga shilem agitsüpur minister 10 rongnung Jaitley, Singh, Mukhtar Abbas Naqvi, Nirmala Sitharaman aser Maneka Gandhi nunger densema lir.
Modi-i, Capitol Complex, Chandigarh nung nisung merirjang aika den shilem agitsü aser cabinet züngsem Singh aser Jaitley nati Lucknow o Mumbai na nung shilem agitsü.