PM Modi den senden kanga junga kaogo: Mehbooba

March 22, 2016 nü PDP tongti lenir, Mehbooba Mufti-i New Delhi nung Ato kilonser, Narendra Modi ajurua Jammu & Kashmir sorkar onük nung senden amenba angur.

New Delhi, March 22 (Agencies): Joko mapang talangka Jammu & Kashmir nung sorkar mekümteti aruba sülen tanü PDP tongti, Mehbooba Mufti-i Ato kilonser, Narendra Modi ajurua senden ka menogo.

Modi den minute 30 shi senden amenba sülen New Delhi nung osangbenertem den jembidang taoba mapang state chief minister, asür Sayeed Mufti’er jala, Mehbooba-i, “Taoba ita ana-asem tashi state nung sorkar mekümteti aruba asenoki nguogo, ajisüaka tanübo ni temelung süogo. Ni temelung kanga asür. State nüburtem atema tongtibang onüktem nung o lemtepogo aser senden junga kaogo,” ta metetdaktsü.

Anogo asem tejaklen BJP chief interlocutor, Ram Madhav-i, par party-i taoba mapang teloktep party, PDP dang nungi takhangba tasen magizüktsü ta sangdongba sülen tanep Mehbooba Ato kilonser, Modi’er kidangi oa liasü.

State nung BJP-PDP teloktep nung mangatettep aliba tembanger asü (?) ta asüngdangba langzüdang lai, “Kodang nai linük Ato kilonser ajurudir Jammu & Kashmir nüburtemi ajuruba tebilemtsü atema lenmangji tejangjaba akumer,” ta ashi.

La Srinagar-i aoba sülen Brihostibarnü lai lar party MLA tem den jembitsü.

“Ni telemtetba ka agitsü atema party MLA temi kü nem tashi agütsüogo. Ni Brihostibarnü senden ka ayongzüka lir aser iba sülen tarutsü nung inyaka aotsütem indang onoki sangdongtsü,” ta lai ashi.

State nung sorkar akumtsü dak sentakba nung lai, “Item ama sangdong agütsütsü atemabo tesem ka lir. Ni Srinagar-i aotsü aser mera tasen agitsü,” ta ashi.

Yashi Mehbooba Delhi semdangba ya lai BJP Tir ajuruba sülen telemtetba tajung ka dangi maruba ajanga maneni lai linük yimtiba semdangba lir.

Tanep Mehbooba-i taoba Finance Minister, Haseeb Drabu densema lar party nung taintem den senden ka mena liasü, aser iba senden nung Ato kilonser den jembitsü atema o lemtepa liasü, ta osang ka ajanga ashi.

Menden 87 aliba state assembly nung PDP MLA 27 aser BJP MLA 25 lir.

Taoba hopta BJP interlocutor, Ram Madhav-i PDP dang nungi takhangba tasen magizüktsü, ta sangdongba den külemi party ana loktepba onük nung ajemdaker state sorkar akumtsü mesüra makümtsüji parnok dak aket, ta shia liasü.

Ajisüaka PDP MP, Muzzafar Hussain Baig-ibo, PDP-i takhangba tasen magutsü saka party ana tsüngda obang meputep aliba ajanga ken o makateti arur, ta jangjashija liasü.

Yaküm March ita nung PDP aser BJP na loktepba sülen onük kar nung ajemdaker sorkar akum, ajisüaka state chief minister, Sayeed Mufti ajungbena asüba sülen lar jala Mehbooba-i Chief minister menden agizüktsü memelungba ajanga January 8 nü nungi state nung Angh yimsüsüba benoka liasü.